National Deworming Day hmang
Nimin khan Mizoram hmun hrang hrangah National Deworming Day hman a ni a, Aizawlah chuan Health minister Lal Thanzara hoin Zarkawt Recreation Centre-ah hman a ni.
Health Minister chuan, National Deworming Day chu rúlhût pài vanga natna hrang hrang thleng thei te, thisen tlakchhamna leh naupang tiṭhanṭhutu ûm bona atana sorkar laipui hmalakna a nih thu a sawi a, "National Deworming Day hi India ram pumah leh Mizoramah February 2016 aṭanga hman ṭhin tawh a ni a, August 10, 2016-a hman ṭum khan naupang sikul kai leh kai lo 82% laiin rúlhât damdawi an ei a ni," a ti.
Mihring nuna zirna, hriselna leh sei lenna atan hun pawimawh ber chu kum khat aṭanga 19 inkar a nih thu sawiin Lal Thanzara chuan, "Hei hi hriain zenghri ûmbo tur te, thisen tlakchham ven nan National Iron Plus Initiative (NIPI) te, Rastrya Bal Swastha Karyakram(RBSK)-te hmangin naupang ṭhang laite hian hriselna ṭha zawk an neih theih nan sorkarin hma a la mek a ni," a ti a; rúlhût damdawi eitir ngai pawimawh turin nu leh pate a chah.
Inkhawm hi Health secretary Lalrinliana Fanai-in a kaihruai a, state programme officer (RCH) Dr K Vanlalzawma chuan mihringin rûlhût a pai theih dan leh rûlhût hlo thawh dante a sawifiah.
National Deworming Day-ah hian naupang kum khat aṭanga 19 inkar zawng zawngte tan rúlhût damdawi, sikul, anganwadi leh ASHA kaltlangin sem a ni a; nimina dawng ve thei lote tan February 15, 2017-ah 'Mop Up Day' neih leh tum niin, rûlhût damdawi sem leh a ni ang.