Silsuri khaw mite insawn turin ngen

Mamit DC Lalbiak­sangi chuan nimin khan an district chhunga khaw hrang hrang - West Phaileng, Hnahva, Silsuri leh Marpara khuate tlawhin, IBBF BADP hnuaia hna thawh mekte leh border fencing-te a enfiah a; Silisuri mipuite chu an awmna hmun tur thar­ah insawn turin a ngen.

Silisuri khuaa van­tlang inkhawm buatsaihah Mamit DC chuan, "Tuna in chenna hi sorkar­in Land Acquisition Act, 1894 hmanga a lak tawh a nih avangin, mipuite’n chanvo in neih tawh lo a, in awmna tur hmun thar­ah a rang thei ang bera insawn turin ka chah che u a ni. Tuna in awmna tur hmunah hian sorkarin khaw mipuite hman tur thil ṭha tak tak a siam mek a, in tan chet lak a awlsam zawk ang," a ti.

Lalbiaksangi chuan, ram kâng tur ven a ṭul thu sawiin, March 15, 2017 hma ngeia lo hâl vek turin a hrilh a; March 15 hnu lama lo hâl reng reng chu dan kalh, police man theih an nih dawn avangin mipuite chu dan zâwm ngei turin a chah.

Indo Bangla Border Fencing (IBBF) hnuaia border fencing hna thawh meka harsatna hrang hrang ramri hnaiha chengte’n an tawh chu Madhukar Gupta Committee-in February 8, 2017-a border fencing an tlawh ṭumin a thlen tih khaw hrang hrang a tlawhnaah sawiin Lal­biaksangi chuan, "Mipui­te hmakhawngai chunga fencing awmna hmun tur chu thlansak turin ka ngen a ni," a ti.