Aizawl khawpui páwna college-ah Lut an tam dan tur ngaihtuah a ṭul - HTE Minister

Nimin khan Higher & Technical Education (HTE) minister Dr R Lalthangliana hoin IASE conference hall-ah HTE department officer-te leh sorkar enkawl college leh institution-a principal-te an ṭhukhawm. Minister chuan, Aizawl khawpui chhung ni lo, district danga college-ah zirlai lut an tam dan tur ngaihtuah a ṭul thu a sawi.

Dr R Lalthangliana chuan, Aizawl khawpuia sorkar college hrang hrangah kum tin first semester admission a lûn em em vek tih sawiin, "Aizawl khaw chhunga college ni lo, district danga college-ah pawh hian engtin nge admission kan tihpun theih ang tih hi vawiina kan inkoh khawm chhan ber a ni," a ti.

College course pangngai bakah, skill development course kalpui theih a ni tih ngaihtuah turin meeting-a telte chu chahin HTE Minister chuan, college-ah skill development course bul ṭan theih a nih chuan Aizawla college chauh ni lo, district danga college-ah pawh eizawnna nei nghal duh zirlai tam takin admission an zawn a rin thu a sawi.

Dr R Lalthangliana chuan, Mizoram chu RUSA hmang ṭangkai ber state a nih thu sawiin, "India ram pumah RUSA zirtirtu 200 pawh tling loah Mizoramin 72 a chang a, mi 69-in an zawm tawh. RUSA-1 leh RUSA-2 kal pui tawh niin, kan ṭhatpui dawn lai takin sorkar laipuiin tihtawp a tum a, theihtawp chhuahin central-ah Mizoram sorkarin titàwp loh turin ngenna a thlen a, cheng vbc. 9 Mizoram tan a rawn dah hlawl mai a, hei hi Mizoram college hrang hrang tan malsawmna a ni," a ti.

HTE Board vice chairman Dr Vanlalṭanpuia, MLA pawhin thu sawiin, "Graduate nih bakah, eizawnna nei tura thiam bik neih hi ram economy tan a pawimawh a, mi zawng zawngin sorkar hna an thawk vek thei lo," a ti a; hna thawk thei Mizoramin a ngah a, mahnia intodelh ṭhalai, eizawnna nei a tam zawk an nih hunah ramin hma a sawn tur thu a sawi. Meeting-ah hian college principal-te chuan, Zoom application, Whatsapp leh Google Class hmangin semester khat chhunga zir zawh tur angte zir a nih theih nan, online class lâk ṭhin a nih thu leh, pdf file-te pawh zirlaite an pek ṭhin thu an tarlang.