Zonal officer-te mawhphurhna hrilhfiah

Chhiatna (disaster) a thlen thulha felfai leh rang zawka enfiah hna leh chhawmdawl hna kalpui a nih theih nana Lawngtlai khawpui veng hrang hrang bialtu tura ruat zonal officer-te chu nimin khan Lawngtlai DC conference hall-ah an tih tur leh mawhphurhnate hrilhfiah an ni.

Meeting-ah hian Lawngtlai DC Dr Andrew Vanlaldika chuan, zonal officer-a ruatte chu an mawhphurhna leh pawimawhna hre chiang a, tlawmngai leh ṭhahnemngai taka thawk turin a chah a, "Lawngtlai hi khuarèl chhiatna thlen hlauhthawnawmna hmuna awm a nih avangin, fûr lai phei chuan fimkhur leh inrálrin reng a ṭul a ni," a ti.

Lawngtlai SDO (Sadar) V Lalruat­liana chuan, zonal officer-te mawhphurhna leh tih tur a sawi a; chhiatna a thlen thulha chhanchhuah leh chhawmdawlna lama che chhuak vat tur Quick Response Team din thar a nih thu a sawi bawk.