MADC-ah MNF leh INC-in sorkar siam an tum ; Congress party hmunpuiin an hriatpui lo

May 5, 2022-a Mara Autonomous District Council (MADC) inthlanpui result May 9-a puan a nih aṭanga chawlhkar khatah pawh sorkar siam thei an la awm loh hnuah, Siaha district-a MNF leh Congress party-te chu sorkar inṭâwm siam turin an inrem. Hetih lai hian, sorkar inṭâwm siam chu Congress party hmunpui lam hriatpui loh a nih avangin show cause notice an inpe dawn.

Siaha district MNF Media & Publicity secretary CL Hranga tarlan danin, MADC-a sorkar siam tur hian MDC pakua nei MNF leh MDC pali nei INC (Congress party)-te chuan May 16, Thawhṭanni zan dar 7 khan Siaha Circuit House-ah inremna an siam a, Joint Legislature Party an din a ni.

INC-MNF Joint Legislature Party din tura party pahnihte an inrem dan chuan, Phúrà biala thlan tlin INC MDC H Malvin chu chief executive member (CEM) a ni ang a, Amotlah biala thlan tlin MNF MDC HC Lalmalsawma Zasai chu deputy CEM a ni ang. MADC chairman atan N Viakhu (MNF) thlan a ni bawk.

Hetih lai hian, Mizoram Pradesh Congress Committee (MPCC) president Lalsawta chuan, MADC-ah sorkar siam turin BJP leh MNF thawhpui loh an rêl tawh thu a tarlang a; chutih laia Mara District Congress Committee leh MDC-te'n MNF-te sorkar siampui an tum chu an ngaih thutak thu leh insawifiah tura hriattirna pek a ngaih dawn thu a puang.

MPCC President chuan nimin khan press statement tichhuakin, "Party duh dan hre reng chunga MADC-a kan hotute leh kan MDC-te'n hetianga sorkar an siampui lui mai hi kan party chuan a ngai thutak hle a. Loh theih lohin 'Show cause notice' kan pek a ngai dawn a. Chumi hnuah kan hotute'n kan kal zel dan tur chu an la ngaihtuah ang," a ti.

MADC inthlanah party mal sorkar siam thei an awm loh avangin Siaha lamah party an indàwr nasa tih sawiin Lalsawta chuan, "MADC area-a kan party pawh kan bâng bik lo tihte kan hriat avang leh party hotute ngaihdan hriat an duh thu saw lama kan hotute'n an rawn thlen avangin PAC Meeting hmanhmawh kan nei a. BJP nen emaw, MNF nen emawa sorkar inṭâwm siam chu ṭha kan tih loh thu kan hriattir nghal," a ti a; chutiang chuan ṭum thum an hrilh bakah, press statement an siam tawh thu a tarlang.

Lalsawta chuan, MADC inthlan result hriat hma pawhin 'Hung council' a awm chuan an dinna tur PAC-in a rel tawh thu a sawi. Congress President chuan, MADC sorkar a piang hrim hrim chu thil lawmawm a nih thu sawiin, "Sorkara chanvo neitu zawng zawng leh Mara ram mipui pawh kan lawmpui bawk a ni," a ti a; chutih rualin, an party dinna ang loa thil a kal avangin show cause notice inpek a ngaih dawn thu a tarlang a ni.