HSLC 2022-ah zirlai 12,304 an pass ; Nikum aiin pass percentage a hniam

Mizoram Board of School Education (MBSE) chuan nimin chhun dar 12 khan High School Lea­ving Certificate (HSLC) Examination 2022 result a tichhuak a, zirlai exam 17,417 zinga 12,304 an pass a, pass percentage 70.64% niin, nikum aiin a hniam hle.

HSLC 2022-ah hian pakhatna pahnih an awm a, Dinsawmkimi d/o Lalhmachhuana, Hunthar Veng, St. Joseph Higher Secondary School leh Lalramdina Ralte s/o Lalṭhakima, Mission Veng, St. Paul's HSS-te an ni. Top 10-ah mi 17 langin, mipa pasarih leh hmeichhia 10 an ni a; hnam dang pathum an tel a, nikum khan Mizo vek an ni thung.

Kumin HSLC-ah hian candidate 17,417 awmin, nikuma candidate zat 18,012 aiin 595-in an tlêm zawk a, pass percentage 70.64 chuan nikuma pass percentage 82.43 a pha lo hle.

Kumin HSLC Exa­mination-ah hian exam hmachhawntu zirlai 17,417 zinga 17,237 chu regular student niin, 180 chu private-a exam an ni a; regular-a exam zingah 12,212 (70.85%) pass in, private candidate 180 zinga 92 (58.51%) an pass. Zirlai pass zawng zawng 12,304-te chu hmeichhia 6,391 leh mipa 5,913 an ni a, pass percentage-ah hmeichhia aiin mipa an sang zawk.

Distinction-ah zirlai 1,437 an pass a, distinction-a pass zat hi nikumah mi 2,904, kum 2020-ah mi 851, kum 2019-a mi 1,177 leh kum 2018-a mi 1,068 a ni. First division-ah zirlai 3,716 leh second division-ah 4,309 an pass a, nikum aiin an tlem zawk ve ve a; third division-ah zirlai 2,842 pass in, nikum aiin an tam zawk. Compartmental chance nei zirlai 185 an awm a, zirlai 4,928 (nikumah 2,856) an fail a ni.

Kumin HSLC Examination-ah hian subject mala full mark hmu science-ah mi pathum an awm a, subject dangah full mark hmu an awm lo. Nikum khan full mark hmu mathematics-ah mi pariat leh science-a mi pahnih an awm.

Zirlai exam zawng zawng pass vekna sikul 98 a awm a, pass awm miah lohna sikul 15 a awm. Candidate-te pass vekna sikul hi nikumah 175, kum 2020-ah 65, kum 2019-ah 72 leh kum 2018-ah 105 an awm a; zirlai fail vekna sikul nikumah pasarih, kum 2020-ah 16, kum 2019-ah 24 leh kum 2018-ah 15 a awm.

Tun hnaia HSLC Examination-a pass percentage zat chu - kuminah 70.64%, kum 2021-ah 82.43%, kum 2020-ah 68.33%, kum 2019-ah 67.93%, kum 2018-ah 76.65%, kum 2017-ah 72.17%, kum 2016-ah 71.17%, kum 2015-ah 68.30%, kum 2014-ah 67.51%, kum 2013-ah 58.63%, kum 2012-ah 72.27% a ni.