Ṭumkawng ṭhat loh vangin airport khâr

18th May, 2022

Lengpui Airport chu a ṭumkawng (runway)-ah pawrh deuh lai a awm a, thlawhtheihna ṭum nan a ṭhat tâwk loh avangin nimin khan khâr a ni. Ṭumkawng ṭha lo lai chu thawm ṭhat nghal a ni a, harsatna dang a awm a nih loh chuan vawiinah thlawhtheihna thlawh theihtir ngei an tum thu GAD (Aviation Wing) hotute chuan an sawi.

Nimina thlawhtheihna a thlawh theih loh tur thu hi thlawhtheihnaa chuang turte chu airline lamin an hriattir a, harsatna eng emaw a awm avanga thlâwk thei lo tur a nih thu an tarlang. Hetih lai hian, thlawhtheihnaa chuang turte'n Lengpui Aiport-a thawkte an biak chuan, runway-ah ṭha tâwk lo lai a awm avangin thlawhtheihna a thlawh dawn loh thuin an chháng a ni.

Vanglaini palai zawhna chhangin GAD (Aviation Wing) hotute chuan, thlawhtheihna a ṭum hmain technical lam mite'n PWD-te nen ṭumkawng an endik ṭhin thu an sawi a, "Vawiin (Thawhlehni) zinga an endiknaah runway-ah a pawrh lai deuh an hmu a, a him lo deuhah an ngai. Chuvangin, fimkhur thilah Airport khâr rih turin thutlukna siam a ni a, hriattir an nih hnuah Airport Authority of India (AAI) lamin hriattirna an chhuah a ni," an ti.

GAD (Aviation Wing) hotute sawi danin, Lengpui Airport ṭumkawngah pawrh deuh lai a awm a, siam tura tih a ni. Mahse, tun hnaia ruahsur avangin siam a ni lo a, ruahin nasa zawkin a hawrh chhia a, chuvang chuan thlawhtheihna ṭumna atan him loa ngaih a ni.

Ṭumkawng chhe lai thawm ṭhat hna thawh nghal a nih thu sawiin Aviation Wing hotute chuan, "Chhun lama kan zawh hman loh chuan zanah thawh chhunzawm a ni ang. Ruahsur leh thil dang eng emaw harsatna a awm a nih loh chuan naktuk (Nilaini) hian thlawhtheihna thlawhtir leh theih ngei kan tum a, kan beisei," an ti.

Hetih lai hian, tun hnaia cheng vbc. 73 sênga Lengpui Airport chei ṭhat hna thawhnaah ṭumkawng cheiṭhat hna thawh a ni a, runway cheiṭhat hna bik chu Phase III-ah a awm. Ṭumkawng bakah hian thlawhtheihna parking area tihzauhna, isolation parking bay atan leh link taxi way-te chu Phase III-ah a awm a, chu'ngte thawhna atan chuan cheng vbc. 23 sên a ni.