'Ruih theih thila buai lo' chungchanga VUC thutlukna ZPM-in zawm an tum

ZPM Executive Committee member-te nimina Dawrpui Multipurpose Centre-a ṭhukhawm chuan, an party-a dinhmun pawimawh chelhtute leh MLA candidate turte ruih theih thilin a tih buai loh an ni ngei tur a ni, tia Val Upa Council-in resolution a siam chu zawm ngei ni se, an ti.

ZPM Executive Committee meeting hi ZPM president Lalliansawta'n a kaihruai a; ZPM Constitution thar, ruahmanna awm tawh chu siamṭhat ngaite siamṭhat a nih hnuin an pawm a, kum 2023 General Election awm tura ZPM Policy an pawm bawk.

ZPM Executive Meeting chuan resolution siamin, "April 28, 2022-a ZPM Val Upa Council ṭhukhawmin Kalphung Thar champion-pui tum kan nih angin, hruaitute chu nungchangah duhtui a ṭul hlein kan hria a. Chuvangin, party-a dinhmun pawimawh chelhtute leh MLA candidate turte chu ruih theih thilin a tih buai loh an ni ngei tur a ni, tih resolution an siam hi ṭha kan ti a, ZPM hruaitute chuan zawm ngei ni se kan ti," an ti.

MNF sorkarna hnuaia Mizoram dinhmun thlirin, kawng engkimah a lungawithlak loha an hriat thu sawiin Resolution chuan, "Hmasawnna hnathawh hrang hrang ṭhuanawp chhan leh ram inrêlbàwlna harsat chhanah MNF sorkar hian hri lêng chhuanlam mahse, chhuanlam tlingah kan ngai lo," a ti a; hripui léng avangin sorkarin mimal, tlawmngai pawl, kohhran leh sorkar laipui aṭangin puihna thâ leh sum tam tak a hmuh thu leh, ram hmasawnna hnathawh leh ram mipui inrêlbàwlna kawngah chhuanlam tling tur khawpin hripui léngin harsatna a thlen loa an ngaih thu a tarlang.

ZPM chuan, "Val Upa Council-in kum 2023 MLA General Election lo awm turah ZPM chief ministerial candidate atan Pu Lalduhoma min puansak hi a lawmawm kan ti a, ‘Kalphung thar, mipui sorkar’ din a nih ngei theihna turin Zoram mipui thlàwpna kan ngen," an ti a; Zoram mipuite'n India ram state ṭhenkhat CM an awh em em ang nei thei turin ZPM a inbuatsaih mek a, 'Kalphung thar, mipui sorkar’ siam turin Mizoram mipui an sáwm a ni.