MNF-Congress sorkar siam tur MNF party-in lawmawm an ti

MNF party chuan thuchhuah siamin, Mara Autonomous District Council (MADC)-ah MNF leh Congress party-te'n sorkarna an siam tur chu lawmawm an tih thu an tarlang.

MNF thuchhuah chuan, "MADC-ah hun eng emaw chen sorkarna siam thei awm loin boruak a chîrî a, hun eng emaw chen a inchiah hnua MNF leh Congress ṭangrual sorkar thar a piang thei tur hi MNF chuan lawmawm a ti tak zet a ni," a ti.

MADC-a sorkar thar a pian theihna tura MNF leh Congress hotute inpekna fakawm an tih thu sawiin MNF chuan, "Mahni indahṭha a, mipui tawrhna awm thei leh chîrî taka Mara ram boruak awm mek titawp a, MNF leh Congress MDC-te inphah hniam a, sorkarna siam tura an pên chhuak hi chhuanawm kan ti tak zet," an ti a; sorkar ṭha leh ngêlnghet an din theih nan duhsakna an hlân.

MNF chuan, MADC-ah party mala sorkarna siam thei an awm lo a, inthlan ṭhat ngai ta se sum tam tak sorkarin a sên leh a ngai dawn tih sawiin, "Hun leh tha tam tak a luang ral ang. Candidate-te'n hun, sum leh thâ eng emaw zat an sên leh a ngai ngei dawn a, chumi pumpelh tura sorkar thar lo piang tur hi lawmawm kan ti tak zet," an ti.