HSLC result-a sawisel duh nei tan Ni 7 chhung hun hawn a ni dawn

Mizoram Board of School Education (MBSE) chairman JH Zoremthanga chuan nimin khan High School Leaving Certificate (HSLC) Examination 2022 result tihchhuah chungchangah thuthar thehdarhtute a kâwm a; exam laiin Covid-19 vei hmuh chhuah zirlai 104 an awm thu leh exam result-a sawisel duh nei tan ni sarih hun an hawn thu a sawi.

JH Zoremthanga chuan, exam laiin zirlai hnawhchhuah ngai an awm loh thu sawiin, "India ram pumah HSLC exam result puang hmasa ber kan nih kan ring a, naupangte'n an kal zelna turah inbuatsaihna hun ṭha an neih kan beisei," a ti a; pass ve lote a tawrhpui thu sawiin, beidawng loa zir chhunzawm zel turin a chah.

HSLC 2022 exam laiin zirlai 104-in Covid-19 an vei tih sawiin Zoremthanga chuan, "Covid-19 positive zinga ṭhenkhat chu a vaia exam lo an ni a, ṭhenkhat chu exam laklawh laia hri vei an ni. An tan compartmental exam rualin special exam kan buatsaih dawn," a ti.

Kum danga result complaint-na hun ni 15 an hawn ṭhin chu kuminah chuan ni sarihah pawh tawi a nih thu sawiin, ruahmanna thar chu zirlai zir chhunzawm duhte'n admission-ah harsatna an neih lohna tura tih a nih thu a sawi.

JH Zoremthanga chuan, kumina HSLC exam pass percentage chu kum 2021 aiin hniam mahse an lungawi thu a sawi a, "Tuna exam-te hian kum hnih chhung online-in class an kal a, thingtlang kilkhâwrah phei chuan signal awm lohnate a awm. Covid-19 lèn hma kum 2020 khan 68% an pass a, tuna exam-te chuan kum hnih offline class an kal a, syllabus 30%-a tihtlem a ni bawk. Heti chunga 70.64% an pass hi kan lawm tak zet," a ti.

MBSE Chairman chuan, zirnain hma a sawn zel theih nan leh siamṭhat zel nan session tharah chuan HSLC syllabus chu 100% tur a nih tawh thu te, exam question pawh Covid-19 lên hma anga siam a nih tawh dawn thute a sawi a; exam result puan a nih theihna atana hma la tu Mizoram sorkar, School Education Minister, SEC, zirtirtu, MISSTA, HISSLAM, MISA, School Education Directorate, DEO, SDEO, MBSE leh Examination branch-a thawk zawng zawng chungah a lawm thu a sawi bawk.

MBSE hotute tarlan danin, exam result-ah tih dik loh a awm loh nan endik dan an kalpui mek chu chhawng hnihin an tihbelh a, kum dang aiin examiner-te briefing an neihpui nasa zawk a ni.