KHAWTHLIR

Kolasib bawrhsap Dr H Lalthlangliana chuan Covid-19 avanga naupang khung hrante rilru leh ngaihtuahna lam vènpuina turah nimin khan hriattirna a chhuah. Bawrhsap chuan, Covid-19 vanga khung hran naupangte'n an duh huna a thlàwna an rilru lama kaihruai thiam bik, counsellor leh psychologist-te biak theihna number 18001212830 (toll free) chu chawhma dar 10 aṭanga chhun dar 1 thleng biak theih 

a nih thu a tarlang.

Aizawl DC chuan, Kanan Veng chhung - Ramnunsangi in aṭanga C Lalthlamuana in, Middle Kanan inkar kawng thlang lam zawng containment zone-a puan tawh chu nimin khan hlih a nih thu a puang. Containment zone huam chhunga swab sample endikte'n hripui an vei lo tih hmuh chhuah a ni.

Champhai DC chuan nimin khan thupek chhuahin Krismas leh kumthar lo thleng tur an district mipuite’n hlim leh muang taka an hman theihna atan an district-ah halpuah, sky lantern, halmawi leh naupang silai lem mu kap chhuak thei chi zawrh, hman leh lakluh a khap. Thupek hian thla hnih a huam ang. 

November 24 khan Tipa (Tuipang) MADC Hall-ah Beti Bachao Beti Padhao hnuaiah 'Advocacy campaign on women empowerment programme' buatsaih a ni. Hmeichhe kalkhawmte chu hleihlenna leh harsatna tâwkte chhanchhuahna dan leh Pre-Conception and Pre-Natal Diagnostic Techniques (Prohibition of Sex Selection) Act, 2003 chungchang zirtir an ni a; Tipa khaw chhunga hmeichhe pawl MChP leh MHIP hruaitute an tel.

Covid-19 vei State Referral Hospital-a enkawl mek zingah ICU-a enkawl ngai ni khat chhung an awm loh hnuah, nimin khan mi pakhat leh a awmpuitu pakhat chu ICU-ah sawn luh an ni a, oxygen nen enkawl nghal a nih thu, SRH-ZMC Bulletin-in a tarlang. SRH-ah hian Covid-19 vei mi 29 an awm mek a, an zingah kum 60 chung lam mi paruk an awm. Nimin khan mi 10 chhuahtir an ni a, an zingah hian ICU-a ventilator hmanga enkawl ṭhin pakhat a tel.