MNF leh Congress party-te thawh dunnain Mara mipui an zahlohzia a lantir - BJP President

BJP, Mizoram Pradesh president Vanlalhmuaka chuan, Mara Autonomous District Concil-a MNF leh Congress party-te thawh dunna chuan Mara mipui an zahlohzia a lantir niin a sawi.

Nimina BJP pisaa inkhawmah thu sawiin Vanlalhmuaka chuan, MADC-ah nasa takin politics a vir vêl tih sawiin, "MNF leh Congress party-te chu inmawngzawmin, Mizoram politics-a a vawi khat nan an thawk dun ta. Party hian nih chhan leh din chhan kan nei ṭheuh a, nimahsela, heng party pahnihte erawh chuan kal dan phung mumal nei loin, lalna leh thuneihna chiah duh an nihzia a lang chiang hle a ni," a ti.

BJP President chuan, Mara mipuite'n MADC-ah hmasawnna beiseiin BJP chu party mala seat tam ber an pe tih sawiin, "Development beiseiin mipui chuan Mara ram hmasawnna an duh ang chu party pahnih, Mizorama party inhal berte hian tihhlawhchham an tum mek," a ti a; inthlan lai aṭangin MNF leh Congress chuan BJP chu an beih ber an ni tawh niin a sawi.

Mara mipuite'n MNF leh Congress-ah rinna an nghat tawh lo nia sawiin Vanlalhmuaka chuan, "Mipui duh thlanna neitu chu BJP party a ni tih seat lak dan aṭangin a chiang tawh. Mipui duh dan loin seat tlemtê chauh hmu Congress party aṭanga chief executive member dah a ni hian lalna chauh âtchilha politics an kalpui dan a tarlang a ni," a ti.

Mizoram BJP vice president Dr BD Chakma, MLA pawhin thu sawiin, BJP-in MADC-ah MDC 12 an nei chu lawmawm a tih thu a sawi a, "Hei hian Mizoram mipuite'n BJP-ah beiseina thar an nei a ni tih a entir," a ti a; "Tuna sorkarna siam tum mekte hi sorkar thianghlim lo leh bawlhhlawh tak aṭanga siam a ni a, hei vang hian sorkar an siam a nih pawhin rei tak an kal thei dawn lo, a chhan chu Assembly House-ah pawh heng party-te hi inbei na ber leh hmelma lian ber an nih vang a ni," a ti bawk.