Lengpui Airport runway chhia hi hriatthiam theih a ni lo - Congress party

MPCC chuan thuchhuah siamin, nimin khan ruahsurin Lengpui Airport-a ṭumkawng (runway) a tihchhiat avangin thlawhtheihna a ṭum thei lo tih an tarlang a, “Fûrpui thlen hmaa ruahsûr vanga Lengpui Airport runway chhia hi hriatthiam theih a ni lo,” an ti.

MPCC chuan, ruahsûrin Lengpui Airport runway a tihchhiat avanga thlawhna ṭum thei lo chu an ngai thutak hle tih sawiin, “MNF sorkarin a tih tur a tih loh avanga he thil hi thleng a ni tih a chiang hle,” an ti a; runway hmun pathumah khuar a awm a, thlawhna lian ṭum nan a hlauhawm theia ngaih a nih avangin Airport Authority of India (AAI) chuan runway a khâr a, nimina thlawhna thlâwk chhuak tur leh ṭum tur zawng zawng sût a nih thu an sawi.

MPCC tarlan danin, Lengpui Airport runway ṭha tâwk lo chu hun eng emaw chen aṭang tawhin a enkawltu engineer-te’n ngaimawhin a siamṭhatna tur sum MNF sorkarah an dil tawh ṭhin a, mahse, MNF sorkarin a ngaihsak loh avangin a pe duh lo a ni.

Congress party chuan, thlawhtheihna cancel a nih avangin mi tam takin harsatna an tâwk nasa tih sawiin, “Zin chhuak tur leh haw tur za tam tak an tangkhang a, sum leh pai tam tak a luan ral phah,” an ti a; MNF sorkar chu a rang thei ang bera ṭumkawng siamṭha tur leh ṭumkawng maintenance ṭha lo chungchanga mawhphurtu zawng chhuaka hrem ngei turin an phût.

MPCC chuan, MNF sorkar chu pawimawh lo zawk ngai pawimawh hmasaah puhin, “Airport páwn lam chei ṭhat ṭul lêm loah kawng chhâwng siam a tum a, work order a chhuah hmain CM duhsak záwng contractor Kamrula Chhangte leh Zoramchhana te hna thawh ṭantir an ni,” an ti bawk.