Bûk tling loah phun lungawi loh tur - FCSCA Minister

Food, Civil Supplies & Consumer Affairs (FCSCA) minister K Lalrinliana chuan, buhfai leh ni tin mamawh dang chhia leh bûk tling lo a awm a nih chuan awmhmunah phun lungawi mai lo a, thuneitute hnena thlen ṭhin turin mipui a chah.

May 16, Thawhṭannia Kolasib College-a Kolasib District Consumers’ Union (KODCU) General Meeting a hmanpuinaah thu sawiin K Lalrinliana chuan, “Mipuite’n consumer an nih anga an dikna chanvo an hai chhuah a, thil dik lo an do ngam a nih chuan ṭul loa sum sên ṭhinte a hum theih a ni,” a ti.

FCSCA Minister chuan, in sakna atana hman cement, iron rod, balu leh rora lei ṭhinte chu tehna leh bûknate a tling leh a ṭha tâwk ngei tur a ni tih sawiin, “Mi pamham leh mahni inhai vûr ṭhin sumdawng leh dawrkaite lakah fimkhur a ṭul,” a ti a; sum tam tak sênnaah mahni dikna chanvo humhim turin huaisen a pawimawh thu a sawi.

KODCU inkhawm­puiah hian chawhnu lamah Kolasib District MJA hruaitute kaihhruainain kum 2022-2024 chhunga hruaitu thar tur thlan a ni.