Leivûng sawngbawl dan mumal lo pawi ti

ZPM party chuan thuchhuah siamin, national highway kawngpui siamtu NHIDCL-in tun hnaia lei an laihna vûngin Mizorama lui ṭhenkhat a tichhia niin an tarlang a, a ngaih thutak thu leh leivûng sawngbawl dan mumal lo chu pawi an tih thu an sawi.

ZPM chuan, “Ram hmasawnna leh khuarel leilung dan hi inbûk tâwk, chhuan lo la awm zel turte tana daih rei taka kalpui tur a nih laiin, hetianga kan ram hmasawnna hnathawhin kan leilung leh nungchate tana thil ṭha lo a thlen hi pawi kan ti tak zet a ni,” an ti.

Hmun ṭhenkhatah chuan ram neitute leh VC-ten ngaihtuahna séngin leivûng paihna (spoil bank) tur hmun an pe tih sawiin ZPM chuan, “Buaina awm thei atan an lo inhmakhua a ni. Kan ram hmasawnna hna thawktu ṭhenkhatin leivûng an paih zawh hnu, a volume an hriat hnuah chauh a dâwlna an siam ṭhin hi a fel lo niin a lang,” an ti a, leivung an dâwl hmaa ruah a sûr chuan chhiatna nasa tak a thleng palh thei tih an sawi.

Mizoram sorkarin July 29, 2020 khan NHAI, NHIDCL, NRRA, BRO, NABARD leh sorkar laipui agency dangte’n Mizorama kawng laih endika vil zui turin Roads and Infrastructure Development Board a din a, chairman chu Chief Minister a ni tih sawiin ZPM chuan, “Fûrpui kan thleng mek a, he Board hian a tih tur tak tiin, kawng siam avanga ram mipui, leilung, thing leh mau leh nungchate harsatna nasa tak a thlen mek lai hian chak zawka hma la turin kan phût a ni,” an ti.

ZPM tarlan danin, sorkarna an siam a nih chuan leivûngte awmze nei leh ṭangkai zawka hmangin, kawng laih turte chu khawtlang hruaitute leh engineer-te nen enho hmasain, leivûng paih tur chu playground leh hmunhma dang hnawhkhah nan an hmang ṭhin dawn a ni.