KHAWTHLIR

Thisen pe
Theiriat Bial PYD-te chuan nimin khan thisen pek an huaihawt a, Lunglei Civil Hospital tan thisen unit 23 an pe a, petute mipa vek an ni.

Hming pe lut
Vawiina Mara Autonomous District Council (MADC) chairman thlan tura hming pek luh hun chu nimin tlai khan a tàwp a, mi pahnihin hming an pe lut. Chairman chuh tura hming petute chu - MNF leh INC Joint Legislature aṭangin Siaha South-I bialtu N Viakhu leh BJP aṭangin Amobyu bialtu N Zakhai te an ni.

DC-in tlawh
Siaha district bawrhsap Lalsangliana chuan nimin khan Siaha district-a khaw ṭhenkhat Tipa-B, Tisi, Theiri, Theiva, Amobyu CH & B leh Amobyu-V khuate chu an khaw dinhmun hriat chianna turin a tlawh. Lalsangliana chuan DC a nih anga district mipuite ṭha taka rawng bawl sak a tum tih sawiin, "Chumi ti thei tura thil pawimawh hmasa ber chu in khuaah ngei lo tlawh che u a, lo in hmelhriattir che u leh in dinhmunte lo hriatchian hi a ni," a ti. Bawrhsap hi khawtlang hruaitute leh tlawmngai pawl hruaituten an lo dawngsawng a, khawtlang tana an mamawh chi hrang hrang an lo thlen a ni.

Pass-te lawmpui
Zirlai pawl pahnih - Mizo Zirlai Pawl leh Mizo Students' Union-te chuan thuchhuah siamin, MBSE-in HSLC Examination 2022 result felfai taka a tichhuak ta chu lawmawm an tih thu te, zirlai pass-te an lawmpui thute leh pass lote beidawng loa zir zel tura an duh thute an tarlang.

Ayush Apke Dwar
Mizoram State Medicinal Plants Board (SMPB) chuan nimin khan Health Services meeting room-ah 'Ayush Apke Dwar' (Ramhmul damdawi kawtkaiah) tih hun an hmang a, SMPB member secretary Dr C Lalzepuii, AYUSH director ni bawkin a hawng.Ayush Apke Dwar hi India ram zalen kum 75-na lawmna Azadi Ka Amrit Mahotsav puala Ministry of Ayush hnuaia National Medicinal Plants Board-in a ruahman a ni a, September 2021 khan bul ṭan niin, Mizoram pum tan Health & Family Welfare minister Dr R Lalthangliana'n September 3, 2021 khan a hawng tawh a ni.