Ni 15 chhung hripui vei thi an awm tawh lo

May 16, Thawhṭanni khan swab sample 394 endik aṭangin Covid-19 vei mi 22 hmuh chhuah a ni a, positivity rate 5.58% a ni. Nimin khan hripui vei dam tawh mi 24 chhuahtir an ni a, hripui vei thi an awm lo a, ni 15 chhung thi an awm tawh lo.

Thawhṭannia Covid-19 positive hmuh chhuahte chu mipa 13 leh hmeichhia pakua an ni a, RAT hmanga hmuh vek a ni. Hmanraw dang hmanga swab sample endik zingah positive an awm lo.

Nimin tlai dar 5 thlenga dinhmun angin, chawlhkar hnih chuang, ni 15 chhung a záwnin Mizoramah Covid-19 vanga thi an awm tawh lo a, thi an awm hnuhnun ber chu May 2, 2022 kha a ni. Tun May thlaah mi pakhat chiah thi a la awm.

IDSP record angin, Mizoramah Covid-19 vei 2,28,022 hmuh chhuah a ni tawh a, mipa 1,06,172 leh hmeichhia 1,21,850 an ni a, mipa aiin hmeichhia 15,678-in an tam zawk. Nimin tlai dar 5 thleng khan mi 2,27,081 (99.59%) chhuahtir an ni tawh a, mi 697 (0.31%) thi tawhin, enkawl mek mi 244 (0.10%) an awm.

Nimin tlai khan Saitual district-ah hripui vei enkawl lai 113 awmin, Mizorama district 11 zingah a tam fál rih a; district pathum - Siaha, Champhai leh Lawngtlai district-ah hripui vei an awm rih lo thung.