Covid-19 vanga sorkar leh khawtlang hmalaknate Champhaiah sawiho a ni

Nimin khan Health secretary H Lalengmawia hoin Champhai DC conference hall-ah Champhai District Task Force (DLTF) member leh sawm bikte'n Covid-19 léng mek chungchanga sorkar leh khawtlang hmalaknate an thlirho.

Health Secretary chuan, Covid-19 donaa hmalakna enfiah tura Champhai tlawh a nih thu sawiin, "Covid-19 dona kawngah state sorkarin theihtawp a chhuah a, hripui thlen hma aṭang tawhin rang taka hmalak nghal vat a ni.

Hmanraw hrang hrangte inchuhna karah rang taka ngaihtuah nghal zung zung a ni a, thlawhtheihna hialte charter-a phurh thlen a ni," a ti. Covid-19 thlentu virus chu ze inthlâk nasa tak, tun thlenga mithiamte zir bing a nih thu sawiin H Lalengmawia chuan, "Test-na khawl ṭha tak Mizoram ngeia din a nih ve ngei theihna turin hmalak nghal a ni a, mithiam­te ráwna hmanruate la khawmin, kar hnih chhungin RT-PCR test kalpui hman a ni," a ti a; tun hnaiah RT-PCR leh a ṭanpuitu khawl dang ṭang kawp­te nen sample endik hna chak taka kalpui a nih thu a sawi.

H Lalengmawia chuan, Indian Council of Medical Research (ICMR) inkaihhruaina ngai pawimawh chungin sorkarin hma a lak thu leh district tinah mithiam­te tírin, an thuràwn zúlzuiin Truenat Quattro RT-PCR dah vek tum a nih thu a sawi a, "He khawl hmang hian Covid-19 mai ni lo, thil chi hrang hrang endik tum a ni," a ti. Health Secretary chuan, sorkarin health sector tihhmasawn kawngah Covid-19 thlen hma aṭang tawhin theihtawp chhuaha hma a lak tawh thu sawiin, "Thawktu, thawhna hmun leh hmanraw mamawh angte pawh a theih anga buaipui a ni," a ti a; Zemabawka cancer veite enkawlna hmuna hman tur cancer hemna khawl cheng vbc. 11 chuang man bun mai thei tura ruahman a nih tawh thu a sawi.

Champhai DC Maria CT Zuali pawhin thu sawiin, Health Secretary-in an hmalaknate enfiah tura Champhai a tlawh chu lawmawm a tih thu a sawi a, "Kan district-ah official, VC, tlawmngai pawl leh media-te inkara thawhhona ṭha tak a awm. Covid-19 mai bakah, tun hnaia lìrnghîng vanga harsatna district-in a tawhte a ṭul anga chhawmdawla ngaihven zel a ni," a ti.