Customs-a register hmante wheat thawnchhuah remti

Sorkar laipui ram danga wheat thawnchhuah a khap hnuah, kar liam taa khapna a tihchhuah hmaa customs-a lo ziah luh tawh ramte hnenah chuan pek chhuah a remti tih nimin khan a sawi.

Commerce Ministry chuan hemi chungchangah hian thuchhuah siamin, "May 13 hma lama Customs hnena lo in register tawhte chu wheat hi pekchhuah an ni ang," a ti.

Sorkar laipui chuan ram chhunga a man sang zel khuahkhirhna tur kawng khat atan May 13 aṭang khan wheat thawnchhuah hi khap a ni. Khapna thupek hi a a tihchhuah thut avangin ram pawna thawn tur wheat phurtu truck sang tel chu lawng chawlh hmun bulah an tangkhang mek a ni.

Sorkarin khapna a tichhuah hian Egypt chuan Kandla port-a wheat an load mek lai a ni a, an load mekte chu thawnchhuah phal tura a ngen hnuah sorkar chuan phalsakin, customs-a lo tihfel tawhte chu thawnchhuah chhunzawm a phalsak zui bawk.

India-in ram danga wheat thawnchhuah a khap hi Group of Seven nations (G7) agriculture minister-te chuan sawiselin, hei hian khawvel huap chaw la indaihlohna thleng mek a tizual dawn a ni, a ti. US pawhin India hi a thutlukna siam hi ngaihtuah ṭha leh turin a ngen a, ei leh in lamah khawvel pum dinhmun chhe mek a tichhe zual dawn niin a sawi.