Murlênah rúl chi thar hmu chhuak

Mizoram Uni­versity-a Department of Zoology-a zirbingmi (researcher)-te chuan tun hnai khan Mûrlên National Park-ah rúl chi (species) thar an hmu chhuak a, a hmingah Murlen hmingchawiin Herpetoreas Murlên an vuah.

Rûl hmuh chhuah thar, Herpetoreas genus hnuaiah khawvelah chi ruk (Herpetoreas burbrinki, H.palealii, H.platyceps, H.sieboldii, H.tpser leh H.xenura)-te a awm a, India ramah chi li (H.palealii, H.platyceps, H.sieboldii leh H.xenura) te hmuh chhuah a ni tawh.

Mûrlêna rul chi thar hmuh chhuah tâk Herpetoreas Murlen hi túr hlauhawm nei lo chi a ni a; a pianphung leh DNA zirchian hnuah rúl chi thar a ni tih German Herpetological Journal Salamandra chuan May 15, 2022 khan a rawn tlangzarh a ni.