Thil phût neih belh zel avangin Bru lak lêt hun tur bituk thei lo

Tripura refugee camp-a Bru awmte'n thil phût an neih belh zel avangin, Mizorama hruai kîr an nih hun turah sorkar laipuiin thutlukna an la siam thei lo.

Bru lâk lêt chungchanga Joint Monitoring Group chu nimin khan Ministry of Home Affairs-a special secretary (Internal Security) Mahesh Kumar Singla hoin BSF Frontier Hqrs., Guwahati-ah an ṭhukhawm a; Joint Monitoring Group-ah hian sorkar laipui, Mizoram leh Tripura sorkar aiawh leh Bru aiawhte an tel.

Mizoram aṭang chuan Home additional secretary Lalbiakzama, ODS David H Lalthangliana leh Central YMA vice president Vanlalruata te an tel.

Bru-te hian thil phût an neih belh zel a, Mizorama an kîr huna an chenna turah in sak lâwk te, an puala khaw thar din te, electoral roll-a inthun thar te, an phû tâwk sorkar hna pek te, camp-a awm chhungin thla tin Rs. 5,000 dawn te, Mizoram an kîr huna chhungkaw tin Rs. 1,50,000 ṭheuh pek leh thil dang eng emaw zat an phût thar a ni.

Phût an neih belh zel avang hian Mahesh Kumar chuan Bru-te aiawha tel Mizoram Bru Displaced People Forum hruaitute chu awmze neia ngaihtuahna sêng turin a hrilh.

CYMA vice president Vanlal­ruata pawhin, meeting apianga Bru-te'n thil phût an neih belh zel vanga Bru-te hruai kir tura hmalaknain awmzia a nei hlei thei lo chu ṭha a tih loh thu a sawi a, "Hun bithliah thuai a ṭul a ni," a ti.

Joint Monitoring Group hi ṭum li an ṭhutkhawmna a ni a, a hmasa ber chu Agartala-ah Sep­tember 30, 2016-ah an ṭhukhawm a, a hnuah Delhi-ah October 10, 2016 leh November 24, 2016-ah an ṭhukhawm leh a ni.

Hetih lai hian, Tripura Bru refugee camp-a Bru-te Mizoram khua leh tui dik tak an nih leh nih loh enfiah hna chu November 3, 2016 khan thawh ṭan a ni a, Mizo­rama let thei turte chu enfiah zawh vek tawh a ni.