Bomb puakah police-in man la nei lo

February 10, 2017 zan dar 9:30 vel khan Upper Republic-a La­bour, Employment & Industrial Training (LEIT) directorate bang bulah bomb a puak a; a tipuak­tua rinhlelh man an la awm lo.

Aizawl Police Sta­tion aṭanga thu dawn danin, bomb puak hian office bang chhak lam, kawngpui àn lama tile 16 leh tukverh darthlalang 47 a tikeh a, a tihchhiat zawng zawng hlut zawng chu Rs. 9,000 vel hûa chhût a ni. Bomb puak hian a bula Vanhlira building tukverh darthlalang pasarih leh ventilation darthlalang pali a tichhe bawk.

Bomb puak hi police-te chuan gelatine a nih an ring a, a puahna hmun tak chu office pawn lama a hungna leirawhchan bang leh office bang inkarah nia hriat a ni.

Bomb puahna hmun hi February 10 zan khan Home minister R Lalzirliana, LEIT minister Lalrinmawia Ralte, DGP Thianghlima Pachuau, Aizawl DC Kannan Gopinathan, Aizawl SP Lalhuliana Fanai, LEIT director Lalhmachhuana leh Forensic mi thiamte'n an tlawh nghal.

Bomb puak chung­changah hian Aizawl PS-ah thubuai ziah luh a ni a; a titu zawn mek niin, rinhlelh man erawh an la awm loa thu dawn a ni.