LEIT Minister leh MYC Chairman-te Vawiinah MNF-in dang dawn rih lo

MNF party mite chuan Labour, Employment & Industrial Traning (LEIT) minister Lalrinmawia Ralte leh Mizoram Youth Commission (MYC) chairman T Sangkunga, MLA-te pisa kai tur an dan chu vawiin zingah an chhunzawm rih dawn lo a; chutih rualin, pisa kai tur an dan hi an la titawp lo.

MNF Action Commi­ttee member-te chu LEIT Minister leh MYC Chairman-te an nihna aṭanga báng tura an phût vanga February 7, 2017 aṭanga an dan mek chungchang chu Inrinni khan an chairman Tawn­luia, MNF senior vice president hoin Mizo Hnam Rûnah an ngaihtuah a ni.

Vanglaini palai zawhna chhangin Tawnluia chuan, vawiin zingah bik chuan Lalrinmawia Ralte leh T Sangkunga te chu ang rih loin, Mizo Hnam Rûnah chawhma lamah inkhawm an nei dawn tih a sawi a, "LEIT Minister leh MYC Chairman kan dan hi kan la titawp lo a, kan la kal zel dawn. Vawiin bikah chuan Hnam Rûnah kan inkhawm phawt dawn a ni," a ti.

MNF party chuan thu­chhuah siamin, "Workers Welfare Board sum nuai 461.75 dik lo taka hman­naah leh sorkar hnathawk ṭhenkhat hnena cheng nuai 52.38 dan kalha pûktirah hian LEIT Minister leh MYC Chair­man-te a mawhphurtu an nih angin an báng ngei tur a ni tih hi kan dinna a la ni reng," an ti a; Chief Minister chu sum tam tham tak tihchingpennaah thûk taka a inrawlh vanga LEIT Minister leh MYC Chair­man-te hum tlatah an puh.

MNF chuan, NIAS, Kol­kata avanga boruak kal mekah mipui tithlabár leh tichî-âi zawnga mi ṭhenkhatin poilitics bawlh­hlawh tak vawrh chhuak a, LEIT Directorate bula bomb tihpuah a ni chu an dem thu an tarlang a; bomb tipuaktute rang taka man chhuak turin sorkar an phût.