June 2017ah Sainik School peih tum a ni

Sainik School, Chhingchhipa mi chu April 2017 aṭangin class ṭan a ni dawn.

In sak zawh loh eng emaw zat la awm mah se, pawl 6 chauh ṭanna turin peih thawkhat a nih tawh thu a enkawltute chuan an sawi. Sainik School building-te hi June 2017-ah sak zawh beisei a ni.

Congress party ṭhalaite chuan Inrinni khan Sainik School tur sak mek hi an president Vanlalawmpuii Chawngthu, MLA hoin an tlawh a, Home depart­ment-a joint sceretary Lalhriatpuia leh hnathawktu Prasad & Co. Pvt. Ltd., Hyderbad hotute'n an hna thawh dan leh hmabak la awmte an hrilhfiah.

Vanlalawmpuii chuan, Sainik School din chu kum 2008 inthlan dawna Congress party manifesto zinga mi a nih thu sawiin, "Zoram hmakhua ngaia sorkarin hetiang a din hi a lawmawm hle a, chuvangin a hmun ngeia tlawh hi ṭha kan ti a ni," a ti.

Mizo ṭhalaite'n state danga Sainik School an pan sup sup ṭhin thu sawiin MPYCC President chuan, "Tunah chuan kan ramah ngeiah Mizo ṭhalaite Sainik School-ah hian an lut ve thei tawh dawn a, a lawmawm hle," a ti a; hmeichhiate an luh ve theih dan tur sorkarin a ngaihtuah mek thu a sawi.

Home joint secretary Lalhriat­puia sawi danin, Sainik School dinna atan hian Chhingchhipa chhungkaw 46-in phût lêt nei loin an ram hectare 212-a zau an pe a; a dinna atan hian 13th. Finance Commission aṭangin cheng vbc. 82.89 leh NLCPR aṭangin cheng vbc. 50 hmuh a ni.

Tun dinhmunah inte sak zawh la ni lo mah se, pawl 6 zirna kalpui ṭan a nih theih nan an mamawh hrang hrangte thuneitute'n an rawn sawi a, chu'ngte chu class ṭan hmain peih vek hman a ni dawn.

Sainik School atan hian cheng nuai 881 sengin Sainik School Water Supply siam tum a ni tih sawiin Lalhriatpuia chuan, "Hei hi peih la ni lo mah se, mi pakhat zelah ni tin tui litre 100 pe thei turin ruahmanna siam a ni," a ti.

Home Joint Secretary chuan, a enkawl zuina (maintenance) leh mamawh zualpuite chu state sorkar tum tur a nih thu sawiin, "Ṭul leh mamawh zual leina atan sorkarin cheng nuai 185 a pe dawn," a ti a; cheng nuai 185 chu sikul enkawltu turte'n an indaih dawn loa an hriat avangin Chief Secretary hnenah ngenna an thlen leh tih a sawi.

Prasad & Co. Pvt. Ltd. hotute'n Vanglaini palai zawhna an chhan danin, Sainik School building sak hna hi tun dinhmunah 80% vel zawh a ni tawh a, June 2017-ah chuan zawh vek hman an tum.

Sainik School-ah hian pawl 6 zir tur naupang tan January 15, 2017-ah India ram pum huap entrance exam buatsaih a ni a, Chhingchhipa Sainik School atan bik mi 180 an tling.

Tun thlaah medical exam neih a ni ang a, March thlaah written exam an nei ang a, zirlai 60 thlan an ni ang. April aṭanga class ṭan tum a ni.