NIAS zirlaite thlavang hauhna atan Zirlaite'n kawng an zawh dawn

Aizawl City College Joint Students’ Union (ACCJSU) chuan, Nalanda Institute of Advanced Studies (NIAS), Kolkata-a Mizo zirlai­te'n harsatna an tawh tawrhpuina lantir nan leh sorkar hotute'n zirlaite an diriam zuia an ngaih vanga lungawi loh lantir nan vawiin hian Aizawlah kawng an zawh dawn.

ACCJSU hian Inrinni khan Aizawl Press Club-ah thuthar thehdarhtute kâwmin, Aizawla kawng­zawh an tum dan an puang.

ACCJSU president Zodin­sanga chuan, NIAS-a zirlaite'n an harsatnate an hnenah an thlen a, a ṭul anga hmalakpui turin an ngen tih sawiin, "February 11, 2017-ah ngun takin kan ngaihtuah a. Kan zirlaipuite harsatna tawh mek leh an chunga thil thlenga an thil phût tihhlawhtlinsak an ni lo leh diriam an tawk hi pawi kan ti a, an tawrhna hi kan tawrhnaah kan ngai," a ti.

Zodinsanga chuan, Mizoram Youth Commission (MYC) leh Labour Employ­ment & Industrial Training (LEIT) department-in Wor­ker Welfare Board sum hmanga zirlai a tirh chhuah danah thil dik lo tam tak awma an ngaih thu sawiin, "Zirlaite harsatna leh mangannaah ṭha taka lo dawnsawn a hnêka zirlai awm ṭha duh lo leh thatchhe lailet dêr anga ram hruaitu ṭhenkhatte’n an lo chhuah hi zirlaite hmuhsitna dik takah kan ngai," a ti a; zirlai harsatna tâwkte hmusittu ram hruaitute chu ngaihdam dil turin an phût tih a sawi.

ACCJSU hotute chuan, NIAS-a an zirlaipuite chu tute'n emaw sum siam nana zirna in mumal loah Mizoram sorkarin a tíra an ngaih thu sawiin, "Hetiang hi tun hnuah vawi khatmah thleng tawh lo se kan duh. An harsatna tawh hrang hrangte vanga sum leh pai, thâ leh zung an sên tawh zawng zawngte phuhrûk tura zangnadawmna Mizoram sorkara NIAS zirlaite’n an beisei hi tihhlawhtlinsak ngei turin kan phût a ni," an ti.

Zawhna chhangin ACCJSU hruaitute chuan, NIAS-a Mizo zirlaite buaina chungchanga MZP leh MSU hmalakna chu an duhkhawp lo hran lo tih an sawi a, "An harsatna an rawn thlen avangin hmalakpui kan tum mai a ni," an ti a; an ngen leh phûtte tihhlawhtlin a nih hma chuan hma an lak zel dawn thu an sawi.

ACCJSU President chuan, political party ṭan lam neia hma la an ni lo tih sawiin, "Kan zirlaipuite harsatna hi sutkian a nih theih nan hma kan la mek a, kan hlawhtlin hma chuan kan la zel dawn a ni," a ti.

ACCJSU-in vawiina 'Zirlaite thlavâng hauhna kawngzawh' an huaihawt tur hi chawhma dar 11-ah an ṭan dawn a; Chanmari kawn leh Sikulpuikawn aṭanga zawh ṭanin, Vanapa Hall kawtah an intâwk khawm dawn a ni. Vanapa Hall aṭanga chhim lama awm college zirlaite'n Sikulpuikawn aṭangin an zawh ṭan ang a, Vanapa Hall hmar lama awm college-te'n Chanmari kâwn aṭangin an zawh thung ang.