KHAWTHLIR

Thisen pe
Inrinni khan Model Veng Branch KṬP chuan Synod Hospital tan thisen unit 33 an pe a, a petute mipa 32 leh hmeichhia pakhat an ni. Kristian Boidkhali Dol, Chawnpui Phairuangkai-te pawhin Lunglei Civil Hospital-ah unit 10 an pe bawk.

Hmeichhe Inkhawmpui
Presbyterian Kohhran Hmeichhiate chuan February 10, 2017 zan aṭanga nizan thleng khan pastor bial hrang hrangah inkhawmpui an hmang. Kohhran Hmeichhia bial inkhawmpuiah hian Inrinni khan rorel inkhawm an nei a, nimin khan nilengin Pathian biak inkhawm an nei.

Minister-in tlawh
Minister Lal Thanzara chuan Inrinni khan Tui­rial Hydro Electric Project a tlawh a, hnathawktu North Eastern Electrical Corporations Ltd. hotute hydel project hi hman theih tura hnathawh zawh hnaih a nih thu an lo hrilh. Lal Thanzara chuan hna ṭha tak an thawh hmuh tur a awm chu a lawmawm a tih thu sawiin, hna thawktute chu ruahman anga hna ṭha taka an zawh theih nan duhsakna a hlan.

Lok Adalat thu
Inrinni khan Lawngtlai District Court building-ah Lok Adalat an ṭhu a; State Bank of India leh Mizoram Rural Bank aṭanga pawisa pûk, rûl ṭha leh thei lo mi 253-te chungchang an ngaihtuah. Lok Adalat-ah hian loan rûl ṭha thei lote'n loan an rulh theih dan tur an sawiho a ni a; loan an rulh dan tur ruahman anga ti theite tan loan an lak chu a vaia rulhtir loin, 30% thleng an ngaidam thei a ni.

Gutkha hâl
Biate Branch MHIP chuan, Gutkha aṭanga thil siam chi hrang hrang an mante chu Inrinni zing khan Biate V/C House tualah an hâl. Gutkha leh vaihlo aṭanga thil an hâl tâkte hi dawr hrang hrang aṭanga an man khawm a ni a; hâlna inkhawmah hian Biate VCP RV Hluna leh YMA president R Lalremkunga ten thu an sawi. An thil hâl ral hi cheng sing chuang hû a ni.