Sorkarin VTP hrang hrangah Rs. 8,87,76,285.25 a ba mek

Skill Development Initiative Scheme hnuaia nodal department, Labour Employment & Industrial Training (LEIT)-in vocational training provider (VTP) a kalpuiah VTP hrang hrangte'n ṭhalaite thil hrang hrang an zirtirna atana sum hman Rs. 8,87,76,285.25 a batsak mek.

LEIT department hotute hnen aṭanga thu dawn danin, LEIT-in VTP 24-te hnena sum pek tur a bat hi sorkar laipui tum tur a ni a; Mizoram páwna a bat zat chu Rs. 7,43,89,535.25 niin, Mizoram chhunga a bat zat chu Rs. 1,42,21,950 a ni.

LEIT hotute chuan, VTP ṭhenkhatte aṭanga an hriat danin, India hmarchhak bika VTP leiba hi sorkar laipui aṭanga rulh tumna a awm nia an hriat thu an sawi laiin, sorkar aṭangin hriat an la neih loh thu an sawi a; VTP aṭanga zir chhuak ṭhalai ṭhenkhatin eizawnna atan an hman laiin, ṭhalai eng emaw zat chu an hnathawhna aṭangin an lo haw leh tawh tih an sawi.

LEIT department hotute sawi danin, VTP-te chu LEIT department-ah an inziak lut a, zirlai an neih zat tur leh trade hrang hrang zir theihte LEIT-in a pawmpui hnuah training an kalpui ṭhin. VTP hnuaiah hian computer, spa, workshop, hospitality, electronics leh thil dangte an zir tlangpui a; exam-ah an pass chuan National Council for Vocational Training-in certificate an pe ṭhin.

VTP-a ṭhalaite'n thiam thil an zirna atan hian sorkar laipuiin bituk chin neiin sum a tumsak a; training laiin VTP-te chuan zirlaite hnathawhna hmun tur an zawnsak lâwk tur a ni. VTP tina zirlai zinga 70%-in hna an hmu ngei ngei tur a ni a, thla khatah Rs. 8,000 aia tlem lo an hlawh tur tih a ni bawk. VTP-te'n an zirlaite hna an hmuhsak lo a nih chuan third batch aṭangin training an tihzui phalsak a ni tawh lo.

LEIT department hotute chuan, an hnuaia VTP-te'n an zirlaite hna an hmuhsak tlangpui a, an beisei ang tak erawh a nih loh thu an sawi a; Mizo ṭhalaite zingah thla hnih/thum vel an thawh hnua chawlhsan leh an awm tam thu te, zirlai zingah tawrhchhel tâwk loh vanga thawk chhunzawm lote an awm nual thute an sawi bawk.

Sorkar laipuiin Mizoram sorkar chu January 2015 khan scheme hnuaiah VTP-a inzir tur Mizo ṭhalai 3,000 vel thlang turin a rawn ti a; Mizo ṭhalai 800 vel an tirh mek laiin, sorkar laipuiah BJP kaihhruai sorkarin scheme thar, PMKVY a kalpui tâk avangin VTP hnuaia training tur zat chu 53-ah tihhniam a ni. Ṭhalai tam tak phai lam an intirh hnuah Central aṭanga sum an hmuh leh si loh avangin leiba a tam zual phah hle niin an sawi.