Republic Veng thlânmual an sâwi khawm

Republic Veng, Upper Republic leh Republic Vengthlang-te chuan kum 50 chuang thlânmual an inhman ṭâwm tawh chu a khah tawh avangin hmun âwl siam belh nan thlan awm tawh sate a hlawmin an dah khawm ṭan a; Inrinni khan hnatlang thawh khatna neiin, mi ṭhahnem tak an thawk chhuak.

Veng pathumte hian vantlang inkhawm koin, thlânmual enkawl dan turah hian mipui ngaihdan an la a; Aizawl páwn lam hmun danga thlânmual tur zawng loin, tuna an thlânmual hman lai chu hman reng theih tura siam zel an rêl a ni.

Khawtlang mipui thutlukna angin Inrinni khan mi phùm tawhna thlânte sâwi khawm hnatlang an ṭan. Hnatlang thawh khatnaah hian terrace angin hmun thumah chhawr-dawh an siam a, chutah chuan thlan 160 aṭanga 180 zel leng tura ruahman a ni.

Inrinnia hnatlangah hian kum 1990 chin hma lama phûm tawh thlante chu a upat dan indawta lài hawng lehin, ruhro an phawrh a; ruhrote chu hmun an ruahmannah an phum khawm leh a, chhinchhiahna fel tak an siam dawn a ni. Inrinnia hnatlangah hian an zo nghal lo a, a remchan angin an tih chhunzawm zel dawn tih an sawi.