Finance Minister-in MFPRTC a tlawh

Finance minister Lalsawta chuan, February 10, 2017 khan Mizoram Food Processing Research & Training Centre (MFPRTC), Phaibâwk, Seling rama mi a tlawh a; Seling khawtlang hruaitute NEDP chungchang a sawipui bawk.

Lalsawta hian MFPRTC-ah hian thlai leh thei silfaina, vawn ṭhatna, her sawmna leh a sawrna hmunte a tlawh a; laboratory, class room, office, mipa hostel leh hmeichhe hostel-te a enfiah.

Finance Minister chuan, NEPD hmalakna hnuaia entrepreneurship training bika kut hnathawktu leh zirlaite tana ei leh in lam sawngbawl zirna hmun, MFPRTC chu a hman tlak dawn em tih enthlithlaia tlawh a nih thu a sawi.

Seling khawtlang hruaitute a kawmnaah Lalsawta chuan, Mizoram mipuite'n an dinhmun ngaiah kum 40 chhung an awm hnuin hmasawnna rahbi lian zawk an neih theih nan NEDP kalpui a nih thu a sawi a, "Mizo mipuite'n ei leh bar, intodelhna kawng leh kan eizawnna kawnga hmalaknaah pawl 12 kan pass-na a rei tawh a, kum 40 chhung vel chu pawl 12 pass ni siin, graduate course-ah admission lak kan tum miah lo. NEDP hmangin ke kan pên a ngai a ni," a ti.