Champhai SP order chhuah hâl
Champhai District Taxi Owners Association leh Champhai District Auto-Rickshaw Owners Association chuan, Champhaia taxi stand leh auto-rickshaw stand sawnna thupek Champhai SP-in tun hnaia a tihchhuah copy chu July 8, Ningani khan an hâl.
Thu dawn danin, Champhai SP Rex Zarzoliana Vanchhawng hoa sorkar department leh páwl hrang hrang aiawhte July 7, 2020-a ṭhukhawm chuan Champhai khawpuia traffic a felfai theih dan tur an rél a; an rèl angin Champhai SP chuan taxi leh auto-rickshaw stand sawmna thupek a tichhuak a ni.
Champhai District Taxi Owners Association leh Champhai District Auto-Rickshaw Owners Association-te chuan, Champhai Vengthlanga Vanlalauvi in leh Lalzidinga in inkara taxi stand leh auto-rickshaw stand sawn a ni chu an hrethiam lo a; an eizawnna nghawng thei leh mipui tana harsatna thlen theiah ngaiin, stand ngaia an din leh theih nan hmalak zel an tum.
Hetih lai hian, Champhai SP hoa July 7-a meeting-ah hian Champhaia MJA President, DTO, YMA Sub-Hqrs aiawh leh Champhai Vengthlang VCP bakah, Champhai District Taxi Owners Association leh Champhai District Auto-Rickshaw Owners Association hruaitute an tel nia thu dawn a ni.
Champhai SP thupek anga taxi leh auto-rickshaw stand sawnna tur thupek hi nimin aṭanga hman ṭan tura tih a ni a; hman ṭan ni, nimin bikah chuan stand hlui leh stand tharah an ding lo ve ve a ni.