NIAS-a zirlaite thlavâng hauh nan College zirlaite'n kawng an zawh

Aizawl City College Joint Student Union (ACCJSU) bultumin, nimin khan Aizawla college zirlaite'n NIAS, Kolkata-a zirlai tirh an duh loh lantir nan leh zirlai harsatna tawkte zangnadawmna pek phûtin Aizawlah kawng an zawh a, vawiinah Chief Minister bangla bulah sitting demonstration an nei dawn.

Zirlaite hian chawhma dar 11 pelh hret aṭangin Sikulpuikawn leh Chanmari kâwn aṭangin Vanapa Hall panin kawng an zawh a; Vanapa Hall kawtah an intâwk khawm a ni. Sikulpuikawn aṭangin Aizawl chhim lama college zirlaite'n an zawh a, Chanmari kawn aṭangin Aizawl hmar lama awm college zirlaite'n an zawh thung.

Zirlaite hian zirlaite diriam ching sorkar an duh loh thu te, sorkarin NIAS-a an tirhte zangnadawmna pek an phût thu te, zirna in hriat chian loha sorkarin zirlai a tír chu an dem thute leh, zirlai awm ṭha duh lo anga puhtu sorkar an dem thute an auchhuahpui a ni.

Kawng zawhnaah hian mi 2,500 vel an tela an ngaih thu, CID lam chuan an sawi. Aizawla college zinga pathum chu thuneitute'n an khap avangin an tel lo nia thu dawn a ni.

Vanapa Hall kawtah hian ACCJSU president Zodinsanga chuan an thil phût chungchangah sorkar koh ei ngei an duh tih sawiin, "Kan ko eih lo a nih chuan a ṭul angin hma kan la zel ang," a ti a; eng pawh hmachhawn ṭul se, zirlaite chu huaisen leh chak deuh deuh tura inbuatsaih zel turin a chah.

ACCJSU hruaitute chuan, kawng an zawh avang hian Chief Minister emaw, mi dang tu pawh báng turin an phût lo tih an sawi a, "Báng kher lo hian kan thil phût hi an tihlawhtling thei tih kan hria, chu chu kan nawr a ni," an ti. "Kan zirlaipuite thlavâng kan hauh a ni. Diknain rorel se la, dikna hi luipui angin luang rawh se. Dikna duhin kan ding chhuak a ni," an ti bawk.

NIAS, Kolkata-a tirhte zinga mi C Laltlanmawia pawhin thu sawiin, sorkar tihmualpho tum hrim hrim vanga NIAS-a zirlaite chuan hma la an nih loh thu a sawi a, "Theihtawpa official leh sorkar hotute kan dawrnain awmzia a neih loh avangin, ACB-ah FIR kan thehlut a, FIR pawhin awmzia a awm tak loh avangin rorelna dik duhte au chhuahna atan hma kan la a ni," a ti.

Vanapa Hall kawtah hian zirlai kalkhawmte chuan resolution panga an pass a; Mizoram sorkar chu an zirlaipuite zirna in mumal loa an tirh vanga harsatna tâwkte zangnadawmna pe nghal turin an phût a, an pe nghal lo a nih chuan tiamchin awm loa an zirlaipuite tana lungawi lohna an lantir tur thu an tarlang.

Resolution pass a nih hnuah ACCJSU hruaitute chuan chief minister Lal Thanhawla a pisaah hmuh an tum a, mahse, an hmu thei lo. Zirlaite chuan an hmalak zel dan tur an ngaihtuah zui nghal a ni.

College zirlaite hian vawiinah Chief Minister chenna bangla bulah an thil phût nawr zui nan zing dar 9 aṭanga tlai dar 2 thleng sitting demonstration neih an tum a, hemi hun chhunga an thil phût tihhlawhtlin a la nih loh chuan naktukah total bandh an huaihawt dawn a ni.

Zirlaite resolution pass-te
w Mizoram sorkarin zir chianna mumal awm loa Mizo zirlaite hriat chian loh zirna-inah min tír hi pawi kan ti a, tun hnuah thleng tawh suh se.
w Mizo zirlaite'n Mizoram sorkar tihsual vanga harsatna leh buaina an tawh mek laia sorkar hotute'n diriam taka an laka ṭawngkam an chelek hi kan rilru a ná a, kan dem tak zet. Sorkar hian ngaihdam dil ngei rawh se.
w Mizoram sorkarin Mizo zirlaite Mizoram páwna a tirh chhuah reng reng ngaihven zui tawh rawh se.
w Kan zirlaipui exam duhte hi sorkar hian an exam ngei theih nan hma la se la, an lo exam thei lo emaw, certifcate lem an dawng emaw a nih chuan Mizoram hian a thil tihsualah hian mawhphurhna lain, an harsatna enpui zui rawh se. Tun hnu zela an hmakhua tur ngaihtuah bawk rawh se.
w Mizoram sorkarin NIAS-a kan zirlaipui a tirh, harsatna tâwkten sum tam tak leh an hun hlu tak an sên ral rulh lêt nan Mizoram sorkarin zangnadawmna a pe ngei tur a ni.