MPC-in Bru thil phût belh ṭha an ti lo

MPC party office bearer-te an president Lalhmangaiha Sailo hoa nimina an pisaa ṭhukhawm chuan resolution pass in, Tripura-a Mizoram Bru-te'n thil phût an neih belh zel chu ṭha lo an ti thu an tarlang a; Bru hruai kîr tumnaah ngaih­tuahna felfai tak nei turin Mizoram sorkar an ngen.

MPC resolution chuan, "Mizoram aṭanga anmah­ni duh thu ngeia Tripura-a pém Bru-te hruai kîr leh tura Central sorkarin hmalakna tluantling a neih vek tawh hnu pawha Bru-te'n thil phût an neih belh zel vanga hruai kîr tura hmalaknain awmzia a nei thei lo zel hi ṭha kan ti lo. An beisei leh duhthusam ringawt thlirpui lo a, kan ram leh hnam hmakhaw ngai chung zela Bru-te hruai kir chungchangah fel taka ngaihtuah turin sorkar kan ngen a ni," an ti.

MPC party chuan, Na­landa Institute of Advance Studies (NIAS), Kolkata-a zirlai 32 tirhte'n buaina leh harsat­na lian tak an tawh chungchangah Mizoram mipuite'n thu dik leh belhchian dâwl hre thei loin an awm niin an sawi a; mipui hriatah white paper siam a, thu dik tak puang turin Mizoram sorkar an phût.

MPC chuan, CSS hnuaia Hindi zirtirtute'n hun rei tak hlawh an la thei lo chu Mizoram sorkar inthlahdah leh dâwngdah vangah an puh a; a rang thei ang bera hlawh pe turin Mizoram sorkar an phût a ni.