PRISM hruaitu man, bail-in an chhuah zui

PRISM president Vanlalruata leh general secretary RL Liantluanga te chu nimin chawhma dar 10:45 vel khan PRISM office, Upper Republic-ah police-te'n an man a, nimin vek khan bail-a chhuah niin, February 16, 2017-ah Special Court (Prevention of Corruption Act)-ah inlan tura tih an ni.

PRISM hotute sawi danin, an president leh GS hi an man chhan ber chu Court-a an in lan loh vang a ni. Vawi hnih vawi thum court a an kal a engmah sawi mumal anih ṭhin loh avang leh Kau Tlabung case chungchang Court thu vangin November-a an pawl ṭhukhawm chuan Court thawhpui tawh loh a rel a ni. Hei vang hian December a court a kal tura kohin an kal lo a, February 16 a court a hruai turin special judge Lucy Lalrinthari'n Aizawl P/S hnenah thu pein man an ni ta a ni

PRISM chuan, corrup­tion case hrang hranga Court-a prosecution witness-a an dinnaah eirua an ngaihte hrem an ni thei lo leh an zalen zel chu an hrethiam lo tih sawiin, "November 1, 2016 khan Court thawhpui tawh loh kan lo rel tawh..." an ti a; eiruk hmangte thil tih chu mipui court-ah, mipuiin dik leh dik lo an thliar turin an thlen tawh zawk rih dawn a tih an tarlang.