India huap badminton intihsiakna CM-in hawng

Central Civil Services Cultural and Sports Board chuan, nimin khan R Dengṭhuama Indoor Stadium-ah sorkar laipui leh state sorkara civil service-te inelna, All India Civil Services Badminton Tournament 2017 an buatsaih ṭan a, chief minister Lal Thanhawla'n a hawng.

Chief Minister chuan, sorkar laipui leh state sorkar hrang hranga sorkar hnathawkte inelna Mizoramin a thlena mi ṭhahnem tak an tel chu lawmawm a tih thu sawiin, "Inter ministry inelna hian sorkar hnathawkte inkarah inlaichinna leh inṭhian ṭhatna ṭha a thlen ṭhin a ni," a ti.

Mizoram chu state naupang a nih avangin infiamna hmunhma a neite'n beisei leh duhthusam a phak lo a nih pawhin ngaihhlutsak turin Lal Thanhawla chuan inelnaa telte a ngen a; sorkar hnathawk infiammite chu hun duhawm tak hmang tur leh infiammi rilru thianghlim pûa intihsiak turin duhsakna a hlan.

Sports & Youth Services minister Zodintluanga pawhin thu sawiin, infiammite chu hun ṭha tak hmang tur leh hlawhtlinna an neih theih nan duhsakna a hlan a ni.

Tournament hawnna hi chief secretary Lalmalsawma, Organising Committee chairman ni bawkin a kaihruai a; India aiawha ṭum hnih Olympics-a tel tawh thal kah thiam, R Lalremsanga kaihruaiin oath taking neih a ni.

All India Civil Services Badminton Tournament-ah hian state leh union territory 31 aṭangin sorkar hnathawk infiammi 380 vel an tel a, mipa team 34 leh hmeichhe team 25 an ni. AICS tournament hi Mizoramin kum 1997, 2004 leh 2012-ahte a lo thleng tawh bawk.