NIAS leh tuifinfiata vûr tlang tehkhin

ZNP president Lal­duh­oma chuan, NIAS, Kolkata chungchanga Mizoram sorkar thil tih dan chu, "Tuifianriata vûr tlang, a hmáwr lo lang dêt dêt, a tak lian zawk erawh hmuh theih loha tui chhunga awm ang hi a ni,” a ti.

Nimina ZNP pisaa inkhawmah thu sawiin Lalduhoma chuan, “NIAS chu vocational training provider (VTP) pakhat ve mai a ni a, kan la hre séng lo. VTP kan hriat chin 34 list ka nei a, khangho zawng zawng hnenah khan sum eng zat nge an lo sên tawh tih hi la hlìm belh tur a tam em em a ni," a ti a; tunah hian Workers Welfare Fund aṭanga VTP hnena pek tur sum bat tling khawm chu cheng nuai 800 chuang a awm thu a sawi.

Chief Minister-in NIAS chu zirna in lem (fake) a nih leh nih loh zir chiang tur tirh an tum thu a sawi chungchangah Duhoma chuan, “Tute emaw tirhna chi a ni lo a, a lem leh a tak fiah tura kalna chi a ni lo. West Bengal sorkar te, AICTE leh University Grant Commission-te zawh mai tur a ni,” a ti.

Lalduhoma sawi danin, NIAS, Kolkata chu AICTE-in a pawmpui loh zirna in zingah a lang a, serial no. 15-naah a awm a ni.

ZNP President chuan, February 10, 2017 zana Upper Republic-a bomb tihpuah chungchangah, “Bomb a puak ta fo mai a, hei hi Mizoin kan chîn ṭhin pangngai a ni lo a, ringlo mite hnen aṭanga kan zir chhawn thil ṭha lo deuh mai a ni. Bomb tihpuah hi dawihzep hna a ni,” a ti.

Mizoramah tlanchhia leh biru chunga bomb an tipuak ṭhin chu pawi an tih thu sawiin, "Hetiang tih chíng party an lo awm chuan mi rîkrâp zawng ni loa hma la turin kan inngen a ni,” a ti bawk.