CM chawpin báng turin kan nawr ang - MNF Sr. Vice President

MNF senior vice president Tawnluia chuan, February 7-10, 2017 chhhunga LEIT Minister leh MYC Chairman-te an bân phûta an pisa kai tur an dan hnuah, an thil phût tihhlawhtlin a la nih loh avangin hma an la zel dawn tih a sawi a, "Chief Minister chawpin báng turin kan nawr ang," a ti.

Nimina Mizo Hnam Rûna inkhawmah thu sawiin Tawnluia chuan, kar hmasaa ni li chhung LEIT minister Lalrinmawia Ralte leh MYC chairman T Sangkunga te pisa kai thei loa ‘picketing’ an huaihawt chuan sorkar a nghawng hle nia sawiin, "Mizoram

mipui pawhin min pawmpuiin kan hria," a ti a; thâ thawhtute zawng zawng chungah lawmthu a sawi.

Tawnluia chuan, báng tura an phûtte an la báng lo tih sawiin, "An bàn hma loh chuan na takin kan ûm zui zel dawn. Sikul naupangte'n chhûn chawlh an nei zawk ang hian, keini pawhin chhûn chawlh kan nei zawk a, subject hrang hrang kan zir belh a, kan hlawhtlin ngei nan hma kan la zel dawn a ni," a ti.

MNF Action Committee Chairman chuan, Aizawl City College Joint Students Union (ACCJSU) huaihawta zirlaite'n dikna humhim duha an zirlaipui, NIAS, Kolkata-a zirlaite thlavang hauha kawng an zawh chu an chhuan thu a sawi a; duhsakna a hlan a ni.

Tawnluia chuan, zirlai kawngzawh tur tibahlah leh ṭhulh a nih theih nan Congress party worker ṭhenkhatin Pathianni zanah hma an la nia sawiin, tenawm an tih thu a sawi a, "Chief Minister leh Home Minister-in zirlaite awm ṭha duh lo leh demna lam hawi thu an chhâk chhuak kha vanduaithlak kan ti a, kawng zawh ngai hial khawpa sorkar a awm hi kan dem a ni," a ti.

MNF Sr. Vice President chuan, LEIT Minister leh MYC Chairman chu mimalah huatna an nei lo tih sawiin, "Sorkara an mawhphurhna an hlen zo lo leh an thil tih dik loh hi kan beih ber chu a ni," a ti. Thil a buarchuar belh zel nia sawiin, "A mawhphurtu ber chu Chief Minister niin, báng tura kan tihte pahnih bakah Chief Minister chawpa báng tura nawrna chu kan hmalakna tur a ni," a ti bawk.