Tuirial HEP-ah metre 51-a thûk tui tling tawh

Tuirial Hydro Electric Power Project (HEP) siam mekah tuikhuah tlin a ni tawh a; tui tling chu ni tin inches 2 vela a san chhoh thu leh tunah metre 51.8-a thuk tui a tlin tawh thu NEEPCO hotute'n an sawi. Tuirial HEP hi kumin June thlaah hawn hman tum a ni.

Kawlphetha megawatt pe chhuak thei tur Tuirial HEP hi tun hnai khan Power & Electricity department enkawlnaa Chief Minister puitu minister Lal Thanzara'n a tlawh a; a siamtu North Eastern Electrical Corporations Limited (NEEPCO) hotute chuan HEP chu hman theih tura hna thawh zawh hnaih a nih tawh thu an lo hrilh.

NEEPCO hotute sawi danin, Tuirial HEP hi khawvela leia chhûn muk (earthen) tuikhuah (dam) sangber pahnihna a ni a, India ramah a sang ber a ni. Tuikhuah san zawng chu metre 97 a ni a; split gate pathum, turbine pahnih leh tunnel pahnih a awm. Unit pahniha ṭhen a ni a, unit pakhatin kawlphetha megawatt 3 ve ve an pe chhuak thei dawn.

A nih tur ang a nih hunah chuan tui khuahna aṭanga lui hnâr lam km. 45 thleng tuiin a chîm tura ngaih a ni. Tui tihtlin tawhah tun dinhmunah tui tling thuk zawng chu metre 51.8 a ni tawh a, metre 68-a thuk a nih hunah hman theih tura duan a ni.

Ruahman dan chuan, unit pakhat chu June 2017-ah hawn hman tum a ni a, unit pakhat dang chu September 2017-ah hawn tum a ni thung. Tunah hian a sak hna 98% vel zawh a ni tawh a, remkhawm hna thawh mek a ni. Thawktute chuan, hmanrua an mamawh angte an lakkhawm kim tawh thu sawiin, "A remkhawm leh chûl mâm hna thawk mek a ni," an ti.

NEEPCO hotute chuan, Tuirial HEP chu Mizoramin kawlphe­thaah an hnianghnâr phah ngei an beisei thu an sawi bakah, project siam thiam chuan tui hmanga inkalpawhna ṭha tak te, sangha khawi nan leh khualzin hîptu ṭha tak atan hman theih a nih thu an sawi.

Tuirial HEP tlawhtu minister Lal Thanzara chuan, Tuirial HEP siamnaah hna ṭha taka an thawh hmuh tur a awm chu lawmawm a tih thu a sawi a; ruahman anga a hun taka an zawh theih nan duhsakna a hlan a ni.