Hindi-ah Central-in min ngaihthah - Rohluna

Centrally sponsor scheme (CSS) hnuaia Hindi zirtirtute'n thla 10 chhung hlawh an lak tawh loh vanga harsatna an tawh mek chung­changah School Education minister H Rohluna chuan, “Central sorkar hian min ngaihthah hrim hrim a ni,” a ti.

H Rohluna chuan zawhna chhangin, “CSS Hindi teacher-te hi tun February 2017 thla tawp hian an tawp dawn a, hei hi hriain School Education department ka chan tirh (February 2014) aṭang khan ka nawr a ni," a ti a; Lok Sabha inthlanah UPA an chak lo zui a, tuna kalphung tharah nasa takin nawr reng mah se, awmzia a nei mawh hle niin a sawi.

School Education Minister sawi danin, CSS Hindi teacher hi India ramah Mizoram leh Nagaland-ah chauh an awm a, Mizoram ang bawkin Nagaland-ah pawh an buai a ni. Nagaland-ah chuan CSS Hindi teacher 1,379 an awm a, Mizoramah chuan 1,305 an awm thung.

Sorkar laipuiin CSS Hindi teacher a pek chu an hlawkpui leh hlawkpui loh zir chian an tum nia sawiin, Rohluna chuan, "Evaluation neihte an tum a. Hemi atan hian mi dang (third party) Lucknow-a pawl pakhat an hmang dawn a, thla thum chhunga zawh turin an ti a ni," a ti a; zir chianna neih hnuah CSS Hindi teacher pek zui dawn leh dawn loh chu a chiang dawn niin a sawi.

H Rohluna chuan, CSS hnuaia Hindi teacher-te chu Mizoram sorkar tan rawih chhunzawm a harsat thu sawiin, "An thla khat hlawh ringawt pawh cheng nuai 300 dawn lai a nih avangin kan state sum aṭang chuan chuti maia rawih chhunzawm thei kan ni lo,” a ti.