Covid-19 vei BSF-te chungah dan angin hma la chhunzawm

Lunglei District Task Force (DTF) chu July 8, Ningani khan an ṭhukhawm a; tun hnaia an district-a Covid-19 vei hmuh chhuah sipaite'n hmun hrang hranga contact an neih dan leh chumi chungchang bawhzui dante an sawiho. Meeting-ah hian, BSF-te chung­ah dan anga hmalak zui zel a nih thu an tarlan.

Meeting-a tarlan danin, BSF-in an mi leh sate qua­rantine an kalpui dana thil fel tâwk lo a awm chung­changah July 5, 2020-ah thupek chhuah a ni a, thuneitu hriat loha hmalakna nei tawh lo tura hriattir an ni. Hemi chungchanga hi July 6 khan BSF hotute sawipui a ni bawk.

BSF mi leh sa, Co­vid-19 veite inentirna (clinic) pawh thu leh awm hma atan July 8 aṭangin khâr rih a ni a; a ṭul angin dan anga hmalak chhunzawm zel a ni. Tun hnaia BSF sipaite kaihhnawiha thil thleng vanga kawng hrang hranga hmalaknate chu Lunglei DTF chuan ṭha tawkin an hria a, Co­vid-19 laka invênna turin theihtawpa hmalak a nih tih tarlangin, chî-âi lo turin mipui an ngen.

Lungleia Covid-19 vei hmuh chhuah tharte chêt velna aṭanga hri inkai darh theih a nih avangin, BSF sipai, hripui veite kalna vengte chuan an veng chhungah total lockdown an kalpui hlawm. An dinhmun ngun taka ngaihtuah a nih hnuin Lunglei DTF chuan total lockdown chu kalpui chhunzawm ni se, an ti a; district huap emaw, Lunglei khawpui pum huap emaw, primary contact awm lohna vengahte erawh chuan total lockdown kalpui a ṭul rih loah an ngai thung.

Lunglei DTF chuan, mipuite chu fimkhur taka awm tur leh sorkar­in kaihhruaina a siamte ṭha taka zâwm turin an ngen a, "Total lockdown kalpui mekna vengah pawh swab sample lâkte result hriat a nih hnuah hmalak zel dan tur ngaihtuah a ni ang," an ti.