ACCJSU hruaitute CM office bulah pungkhawm ; CM an kawm hnuah total bandh thulh

Aizawl City College Joint Students Union (ACCJSU) huaihawtin nimin khan NIAS, Kolkata-a zirlaite thlavâng hauhna atan Chief Minister bangla luhna gate bulah lungawi lohna lantirna atan sit-in demonstration an nei a; vawiina total bandh neih tum erawh CM nen an inbiak hnuah an ṭhulh.

CM bangla kawtah hian college hrang hranga student union hruaitute zing dar 9 aṭangin an ṭhu ṭan a, buaina thleng a awm lo. Chawhnu dar 2-ah zirlaite chu ṭin darhin, an kal zel dan tur ngaihtuah an tum laiin chief minister Lal Thanhawla'n a hmuh duh thu hrilhhriat an ni. ACCJSU hruaitute chuan Chief Minister-in a sàwm angin a pisaah an kal a, Chief Minister hnenah hian an thil duhte an thlen a ni. Chief Minister leh amah ṭawiawmtu Home minister R Lalzirlianate chuan an ngaihdante an sawi a, zirlaite thu thlen chu bawhzui an tum thu an hrilh.

Zirlaite hian nimin tlai khan meeting an nei zui a, Chief Minister leh Home minister-in an chhan dan lawmawm an tih thu an chhuah zui a, vawiin lama total bandh neih an tum pawh an ṭhulh thu an chhuah a; amaherawhchu CM chu February 24 hmaa an thil thlente tihfel sak turin an phût.

"Kan CM leh Home Minister-in ziralaite hnena a thutiam hi ACCJSU meeting chuan a ring tawk a, chutih rual chuan anmahni ring tawk tura min ngenna hi ACCJSU chuan Dt.24.02.2017 thleng a nghak dawn a ni. Heta a hlawhtlinna a la hmuh loh chuan ACCJSU chuan nasa leh zualin hma a la ang," tiin hun tiam chhunga an thu thlente bawhzui turin CM leh Home Minister hi zirlaite chuan an phût a ni.

Chief Minister chuan, zirchianna mumal awm loa zirlaite hriat chian loh zirna ina tirh an ni tih chu thu dik a nih thu te, sorkar hotute'n zirlaite an diriam a hriat loh thute leh, Mizo zirlaite Mizoram páwna an tirh chhuahte chu an ngaihven zui ṭhin thute a sawi.

Chief Minister hian Kolkata Mizoram House-a Joint Resident Commissioner chu telephone hmangin a be nghal a; NIAS-a zirlai awm mekte'n eng harsatna nge an tawh leh an thlavâng hauhsak an ngai em, tih finfiah nghal turin a hriattir. a; zirlai thlavang hauh tura amah a inpeih reng thu a sawi bawk.

Home minister chuan zirlaite'n resolution an siam chu an pawmpui deuh vek tih a sawi a, zirlaite compensation pek chungchang erawh ngaihtuah ngun deuh ngai a nih thu a sawi.

Inkawmnaah hian NIAS-a zirlai C Laltlanmawia chu koh a ni a; harsatna hrang hrang an tawhte leh harsatna an neihte chinfelpui tura thuneitute an lo ngen tawh dante a sawifiah a ni.

Inbiaknaah hian Chief Minister hi Home minister R Lalzirliana leh CM principal secratary Lalram Thanga-te'n an ṭawiawm. ACCJSU hruaitute hi Home Minister chuan Thawhṭanni zan khan a inah a lo kawm tawh bawk.