AR hi tlang mite ṭhian dik tak a ni - Rijiju

Union minister of state for Home Kiren Rijiju chuan, nimin khan Khatlaa Assam Rifles 23 Sector headquarters a tlawh a; Assam Rifles chu tlang mite ṭhian dik tak an nih thu a sawi.

State kilkhâwra cheng mipui tan Assam Rifles-te chu malsawmna an nih thu sawiin Kiren Rijiju chuan, "AR-te hi tlang mite ṭhian dik tak an ni. Hemi kawnga an hmalakna hrang hrangte a fakawm hle," a ti.

AR DIG Brig. MS Mokha pawhin thu sawiin, India leh Myanmar inrini venhimna kawnga an hmalakna hrang hrang leh harsatna awm theite Home Minister a hrilh a, Mizoram leh a ramrite a him zawkna atan theihtawp an chhuah thu a sawi.

Union Home Minister hi minister H Rohluna leh parliamentary secretary pahnih - Lt.Col. ZS Zuala leh Joseph Lalhimpuia ten an ṭawiawm a ni.