Bioresources Development Centre lungphùm Union minister Dr Vardhan-a'n a phûm

Minister for Science & Technology and Earth Sciences (STES) Dr Harsh Vardhan chuan, nimin khan Mizoram University campus-ah Mizoram Bioresources Development Centre (MBRDC) hmalakna bul ṭanin lungphùm a phúm a; MZU Department of Biotechnology-a Ad­van­ced State Level Biotech Hub a hawng nghal.

Dr Harsh Vardhan chuan, a rawn kal chhan - biotechnology-a hma­lakna chu sorkar laipuiin information technology (IT) leh hmalakna pawimawh dang ang thoin a ngai pawimawh tih a sawiin, "A hmunhma, sik leh sa leh ramhmul hausakna thlengin a zir avangin, biotechnology hi Mizoram tana hmalakna remchang tak a ni," a ti.

MBRDC hmunhma chu sorkar laipuiin a inhuamna aia zîm a nih thu sawiin Dr Harsh Vardhan chuan, "MZU-in ram zau zawk a pek belh phawt chuan tuna ruahmanna neih sa aia lian zawka kalpui theih a ni ang," a ti a; MBDC hmalakna atan hian sum a harsat loh tur thu a sawi.

STES Minister chuan, lehkha zir sang emaw, thiamna nei sang lo emaw pawh ni se, mihring tumruh, ngaihtuah thiamna nei ṭha leh tih tak taka dinchhuah tumte chu sum leh kawng danga puih an ngaihnaah sorkar laipuiin a puih tur thu sawiin, "Sorkar leh MZU pawhin ngaihtuahna ṭha zawk leh hmalakna sâwt zawk tur in duang chhuak a nih phawt chuan ruahmanna siamin rawn thehlut ula, a hlawhtling ngei ang," a ti.

Mizoram Planning minister Lalsawta pawhin thu sawiin, MBDC avangin sorkar beiseina a san thu a sawi a, "Mizoram hmasawnna lamtluanga rahbi pakhat a ni," a ti a; NLUP hmalakna hnuaiah ramngaw leh nungcha humhalhin rah ṭha a chhuah mek thu a sawi.

MBRDC sakna hmun atan hian MZU-in ram acre hniha a zau a pe a, a sakna atan cheng vbc. 14.65 ruahman niin, kum nga chhunga sak zawh tura tih a ni.