Digidhan Mela ṭan a ni

Nimin khan Mille­nnium Centre chung zâwlah ni hnih awh tur Digidhan Mela (Digital Payment Fair) ṭan a ni a, chief secretary Lal­malsawma'n a hawng.

Lalmalsawma chuan, Digidhan Mela tum ber chu, tangkafai hmang loa technology hmang ṭangkaia indawr tawn dan inzirtirna a nih thu a sawi a, "November 2016-a India sorkarin sum chhehrelh leh hlemhletna tihbo tumnaa Rs. 1000 leh Rs. 500 note a tihthihin India ram chu cashless economy-a siamna atan hma lak mek a ni a, Mela hi chumi tihlawhtling tura hmanraw ṭangkai tak a nih ka beisei," a ti.

Chief Secretary chuan, India ram hmun hrang hrangah Digidhan Mela hman a ni tawh a, hman zel tum a nihi thu a sawi a; Mizoramah pawh district hrang hrangah Mela hi buatsaih tura tih mek a nih thu a sawi bawk.

Digidhan Mela-ah hian stall 60 a awm a; PAN card leh Aadhaar card-te siam theih a ni a; bank 26-in account awlsam zawka hawn theihna hun an buatsaih a ni.