Valentine's Day puala thisen pek rûnpuiah hmun hrang hrangah thisen unit 987 pek a ni

Association for Voluntary Blood Donation (AVBD) chuan nimin khan Mizoram hmun hrang hrangah Mizoram State AIDS Control Society (MSACS) nen ṭanghoin Valentine's Day pualin thisen pek rûnpui an buatsaih a; hriat theih chinah thisen unit 987 pek a ni.

Thisen pek rûnpui hi Aizawlah chuan AVBD, MSACS leh Aizawl Civil Hospital-te nen ṭanghoin Mizo High School Hall-ah neih a ni a; chhun dar 1-ah inkhawm buatsaih niin, Aizawl Municipal Corporation mayor PC Lal­hmingthanga khuallian a ni.

PC Lalhmingthanga chuan, thisen pek chu nunna pekna a nih thu sawiin, "Thisen pek hi mi dang kan hmangaihna lantirna sang ber a ni," a ti a; AVBD-in Valentine's Day puala thisen pek rûnpui an huaihawt leh ṭhalai tam takin thisen an pe chu lawmawm a tih thu a sawi.

Inkhawmah hian AVBD president PC Lalhmingthanga leh MSACS project director Dr Lalmalsawmi Sailo-te pawhin thu an sawi a; zaithiam ṭhahnem tak an zai a, thisen pe zawng zawngte hnenah rose pek zel a ni.

Thisen pek rûnpuiah hian Aizawla Mizo HS Hall bikah chuan mipa 352 leh hmeichhia 104-te'n thisen unit 456 an pe a; Synod Hospital-ah mi 55-in an pe.

Lungleiah chuan Lunglei Civil Hospital leh JB College-ah thisen pek hun buatsaih a ni a; Lunglei Civil Hospital-ah mipa 80 leh hmeichhia 42-te'n unit 122 pein, JB College-ah chuan mipa 35 leh hmeichhia 20-te'n unit 55 an pe.

Lawngtlaiah chuan District Hospital tan mipa 53 leh hmeichhia 19-te'n unit 72 an pe a; Kolasib District Hospital-ah mipa 42 leh hmeichhia 12-te'n unit 54 an pe.

Champhaiah chuan unit 22 pek a ni a, Mamitah unit 16 pek a ni. Serchhipah thisen unit 17 pek a ni a; MZP sub-headquarters, Hnahthial pawhin Valentine's Day pualin Lalnu Ropuiliani Hall-ah blood donation camp an huaihawt a, mipa 79 leh hmeichhia 39-te'n Christian Hospital, Serkawn tan thisen unit 118 an pe a ni.

AVBD joint secretary Lalrinkima'n report a pek danin, Valentine's Day puala thisen pek rûnpui buatsaih hi kum 2010-ah tih ṭan a ni a, a tirah chuan mimal leh ACH Blood Bank-in an buaipui. Kum 2011 aṭangin AVBD bultuma tih ṭan a ni a, ACH Blood Bank leh Synod Hospital tan thisen pek ṭhin a ni. Kum 2014 aṭangin district dangahte pawh tih ṭan a ni bawk.