KHAWTHLIR
Assembly session
Mizoram Assembly budget session chu March 14, 2017-a ṭan turin koh a ni. Nimin khan Governor Lt.Gen. Nirbhay Sharma chuan hriattirnna a chhuah a, session rei zawng tur leh ṭul dang chu speaker Hiphei hoin Business Advisory Committee-in an la ruahman dawn a ni.
Sorkar leh HPC(D) inbiak hun sawn
Mizoram sorkar leh HPC(D) inkara remna kawng zawnga inbiakna, February thla laihâwla chhunzawm tum chu tihkhawtlai hret a ni dawn. Tihkhawtlai a nih chhan hi Finance, DPAR, Law & Judicial department leh inbiakna kaihhnawiha department dang ṭhenkhat biakrâwn ngai an awm vang leh thil ruahmanho a ngaih vangin hun a duh deuh dawn nia thu dawn a ni.
Man la nei lo
February 10, 2017 zan dar 9:30 vela Upper Republic-a Labour, Employment & Industrial Training directorate building bula bomb puak kaihhnawihah nimin thleng khan police-in rinhlelh man an la nei lo. Bomb puak chungchang hi police-in ngawrh takin an chhui zui mek a; Aizawl Police Station-ah thubuai ziah luh a ni.
Ramlaitui sikul
Social Welfare minister PC Lalthanliana chuan February 13, 2017 khan Ramlaitui khuaa RMSA building thar a hawng. In hi cheng nuai 94 chuang seng a sak a ni a; class room pahnih, computer room pakhat, Art & Graft room pakhat, teacher room pakhat, principal room pakhat leh inthiarnate siam a ni.
Swachhata Fortnight tan
National Health Mission bultumin nimin khan Lal Thanhawla Auditorium-ah damdawi-in faina hapta Swachhata Fortnight hman ṭan a ni a, Health principal director Dr K Ropari'n a hawng a; February 14-28
chhunga hman tura tih a ni. Fortnight hi district hrang hrangah pawh hman a ni ang.