MTA-in Good Governance Day sawn ngen

Mizo Theological Association (MTA) chuan, nimin khan India President Pranab Mukherjee hnenah memorandum an thehlut a; Good Governance Day chu sawn turin an ngen.

MTA chuan, Good Governance Day hman tura ruahmanna siam leh sorkar hotute ṭhahnemngaihna chu ṭha an tih thu leh, India rama sakhaw hrang hrangte inpumkhatna atana sorkar policy-te chu ṭha an tih thu an tarlang a; chutih rualin, Kristiante hunpui ber pakhat leh ni serh, Krismas ni tak Good Governance Day atana puan a ni chu ṭha lo an tih thu an ziak a ni.

MTA chuan, "India mipui maktaduai tam takte thlâwpin Good Governance Day atan Diwali emaw, sakhaw dang ni serh emaw, ni dang hrim hrim ruat loa Kristiante ni serh Krismas ni tak, December 25 ruat a ni hi kan dem tak zet... Rilru helna dam thei lo tur a siam avangin rorelna chhe ber chi tarlanna a ni. Hnam tênaute cheh ral leh rahbehna atana BJP-in chi inthliarna huaisâr leh mihring palzût tak mai thuthlung a neih tarlanna chiang tak a ni bawk," an ti.

India rama hnam hrang hrang inpumkhatna thlarau dik tak tun din thar nan leh India mipui, a bik takin Kristian mipui tlêmtete thinlung tihnat tawh ti dam leh turin India President chu kum 2017 Krismas thlen hma ngeia Good Governance Day ruahmanna sût tur emaw, a ni sawn turin an ngen a ni.

MTA memorandum-ah hian president Rev.Dr Vanlalchhuan­awma leh secretary Rev.Dr R Zolawma ten hming an ziak.