Smart City-a tel theih dan tur sawiho

UDPA secretary Dr C Vanlalramsanga hoin Thawhṭanni khan Planning & Programme Implementation department conference hall-ah Smart City chungchang sawiho a ni a; Smart City-a Aizawl thlan a nih ve theih dan tur an sawiho.

Sawihonaah hian UDPA department officer-te bakah, Aizawl Municipal Corporation, PHE, PWD, Power & Electricity, Health & Family Welfare, Environment & Forests, Transport, LAD, Art & Culture, Disaster Management & Rehabilitation, Tourism, Information & Communication Technology department te, SIPMIU, Fire & Emergency Services, Traffic, Town & Country Planning, Sanitation, Asian Development Bank, World Bank, UNDP, Mizoram State Tobacco Control Society, Mizoram University, ICFAI leh NIT aiawhte an tel.

Smart City project hi kum 2015-ah ṭan a ni a, project-a tel turin India ram khawpui hrang hrang thlan ni tawhin, Aizawl pawh a tel. Round khatnaah khawpui 97 aṭangin khaw 20 thlan chhuah a ni a; a dawta fast track competition round April 21, 2016-a neihah khawpui 13 thlan leh a ni.

Round hnihna June 30, 2016-ah khawpui 63 aṭang­in 27 thlan chhuah a ni a; round thumna chu March 31, 2017-ah neih tur niin, khawpui 37 an inel dawn a, chutah chuan Aizawl pawh a tel ngei theih nan Mizoram sorkarin nasa takin hma a la a ni.

Round hnihnaah hian Gujarat-a Vadodara-in point hmu sang berin 55.38% an hmu a, Aizawl chuan 54.32% hmuin, thlan chhuah 27 zingah a tel pha lo.

Sorkar thuchhuah tarlan danin, Smart City Mission kaltlang hian kum 2015-2020, kum nga chhungin India rama khawpui thlan bikah mipui­te tana ni tin khawsak awlsamna siamsak tur­in vantlang mamawh chi hrang hrang changkang zawka thawm ṭhat tum a ni.