NABARD-in nuai 1845.30 a pe chhuak

NABARD Mizoram Regional Office chuan thuchhuah siamin, Mizoram tan tun hnaiah cheng nuai 1845.30 an pek chhuah thu an tarlang.

NABARD tarlan danin, tun hnaiah Rural Infrastructure Development Fund (RIDF XXII) hnuaiah Mizoram tan cheng nuai 1845.30 an pe chhuak a; sum hi Animal Husbandry project pathum leh sorkar Supply kudam panna kawng 82 thuam ṭhatna tur a ni. Heng project atana sum sen zawng zawng tur chu cheng nuai 2136.49 a ni a, NABARD RIDF loan pek bak hi chu Mizoram sorkarin a tum dawn a ni.

AH&Vety dept hnuaia project-in a huam turte - cheng nuai 600 senna tur Thenzawla Goat Breeding Farm (Kel vulh punna hmun) dinna; nuai 313.496 senna tur INBRO Hatchery Farm-a ar note keutirna tihchangtlun leh tihhmasawnna; nuai 200 senna tur Rural Animal Health Centre 10 saknate a ni.

Food, Civil supplies & Consumer Affairs department project atana sum pekte chu Mizoram district pariata kudam kawngte thawm ṭhat leh siam hna hmun 82 atan a ni thung. Project-te hi kum 2018-19 chhunga thawh zawh vek hman tura ruahman a ni.

Sorkar thuchhuah chuan, FCSCA depatment hnuaia Supply kudam panna kawngte siam ṭhat a nih chuan buhfai phurh kual vel a awmsam phah ang a, mipuiin a hun takah buhfai an dawn theih phah beisei a ni tih a tarang.

AH&Vety department project chung­changah, "Ram pawn aṭanga sa leh artui lak luh a titlem ang a, ran damdawi-in 10 sak hian nasa takin hmun hla zawka mite tan ran enkawl hna a tiawlsam dawn. Thingtlang mite tan awlsam zawka ran vulhtute'n an hman ṭangkai theih zawk­na turin Vety institution tihchangtlun leh hmanrua mamawh angte thuam ṭhat vek tura ruahman a ni," an ti.

Tun hnaia NABARD-in RIDF hnuai­a sum a pek chhuah nen hian Mizoram sorkar hnenah project hrang hrang atan cheng nuai 153 an pe chhuak tawh a ni.