Raw chî 6,80,200 supply tur zawn hna kalpui mek a ni

Horticulture department chuan raw chî chi thum - Dendrocalamus Brandisii, Dendrocalamus Sikkemensis leh Dendrocalamus Longispathus supply-tu tur a zawng mek a, raw chi 6,80,200 supply-tu tur zawnna atan tender an chhuah. Tender-te chu May 17, 2022 khan hawn a ni a, a supply tu tur thlanfel a la ni lo.

Raw chi supply-tu tur zawnna atan Horti­culture department chuan April 22, 2022 khan tender a chhuah a, tender chhang­tute'n financial bid leh technical bid an thehluh endik hun hnuhnung atan May 17, 2022 ruat a ni. Dendrocalamus Brandisii, Dendrocalamus Sikkemensis leh Dendrocalamus Longispathus chi 6,80,200 supply tura tih a ni a, raw ṭiak chu centimetre 30 aia hniam tur a ni lo.

Raw chi supply tur chu Socio Economic Development Programme (SEDP) hnuaiah 3,00,000, National Bamboo Mission hnuaiah 24,600 leh North Eastern Council hnuaiah 3,55,600 a ni a; a vaiin 6,80,200 a ni.

May 17, 2022 hma hian December 2018-a MNF kaihhruai sorkar a pian hnuah raw chi supply tur zawnna tender ṭum hnih chhuah a lo ni tawh a, tun ṭuma tender an chhuah leh hi a pathumna a ni.

A ṭum khatna atan June 3, 2020 khan raw ṭiak 1,00,000 supply-na tur tender chhuah a ni a, chumi ṭum chuan Dendrocalamus Brandisi leh Dendrocalamus Latiflorus ṭiak supply-tu tur zawn a ni.

June 3, 2020-a tender chhuah hi chhángtu pakhat chiah a awm a, chhángtu awm chhun Growmore Biotech supply tir a ni. Growmore Biotech hian an authorised distributor F Lalhriatpuii, Ramhlun South hmingin an chháng a; Growmore Biotech Ltd., Tamil Nadu director chu Dr N Barathi a ni thung.

A ṭum hnihna atan May 7, 2021 khan Raw-mi (Dendrocalamus Sikkemensis) ṭiak supply-tu tur a zawnna tender chhuah leh a ni a, mi paliin an chháng. Mi palite'n Rawmi ṭiak supply tur an neih zat chu nuai 2,90,000 a ni a, raw chi supply tura tih zat chu 40,000 a ni thung.

May 7 a tender chhuah Rawmi supply-na tur tender chhángtute chu Mizoram Bamboo Producer (Secondary Hardening Unit, Growmore Biotech), IMCS Nursery Firm, Bairabi Bamboo Producer leh King Industry-te an ni. Mizoram sorkar chuan chhanna inang firm pathum - Mizoram Bamboo Producer (Secondary Hardening Unit, Growmore Biotech), IMCS Nursery Firm leh Bairabi Bamboo Producer-te a supply tîr a ni.

Tender chhuah hmasaka chhángtu awm chhun Growmore Biotech-in authorised distributor atana an hman F Lalhriatpuii hi tender chhuah ṭum hnihnaa raw chi supply tura thlan zinga mi Mizoram Bamboo Producer neitu a ni.