Lengpui Airport khâr leh a ni ; Vawiinah a hman theih dawn

Lengpui Airport chu ṭumkawng (runway) a ṭhat tâwk loh avangin nimin khan khâr leh a ni a, vawiinah erawh chuan thlawhtheihna ṭumtira thlawhtir tum a ni.

GAD (Aviation Wing) hotute hnen aṭanga Vanglaini thu dawn dan­in, Lengpui Airport ṭum­kawng siamṭhat hna hi May 17, Thawhlehni zinga a ṭha tâwk lo tih hriat a nih aṭangin thawh nghal a ni a, nimin khan siam zawh a ni. Siam zawh a nih hnuah mithiamte'n an endik a, a him tâwkah an ngai. Hei vang hian Airport Authority of India pawhin thlawhtheihna ṭum leh thlawh chhuah a theih leh tawh thu an chhuah tawh a ni.

GAD (Aviation Wing) hotute chuan, Lengpui Airport ṭhat tâwk loh avangin mi tam takin harsatna an tawh phah chu pawi an tih thu an sawi a, "Harsatna tâwk zawng zawngte hriatthiamna kan ngen tak meuh a ni. Harsatna tâwk an awm dawn tih hre tho mah ila, an himna kan ngaihtuah a ngai a, loh theih lohna avanga airport khâr a ngai hi pawi kan ti tak zet," an ti.

Tarlan tawh angin, Lengpui Airport ṭum­kawng ṭhat tâwk loh avangin May 17, Thawh­lehni khan thlawh­theihna lut leh chhuak tur zawng zawng sût vek a ni a, siam zawh hman a nih loh avangin niminah pawh thlawhtheihna lut leh chhuak a awm lo.